Ulttyq quryltaida Memleket basshysy Qasym-Jomart Toqaev dini ahýal men qoǵamdaǵy alaiaqtyq áreketterge erekshe toqtaldy, dep habarlaidy Dalanews.kz.
Prezidenttiń aitýynsha, Májilis depýtaty Ermurat Bapi elimizdegi dini jaǵdaiǵa alańdaýshylyq bildirse, quryltai músheleri Daniia Qydyrbaeva men Oljas Súleimen jat dini aǵymdardyń jastar arasynda, ásirese sport salasynda yqpaly kúsheiip bara jatqanyn atap ótken.
"Teris dini aǵymdarǵa jáne qazaqtyń bolmysyna jat ideologiialarǵa tosqaýyl qoiý qajet. Biz eldegi dini bostandyqty qamtamasyz etemiz, biraq bul júgensizdik pen tártipsizdikke jol berýdi bildirmeidi. Din – ultty uiystyrýdyń mańyzdy faktory. Sondyqtan dini uiymdardyń qyzmetin retteitin qujattar osy talaptarǵa sáikes bolýy kerek. Bul máselege jan-jaqty qaraý qajet, sonyń ishinde zańnamany zaman talabyna beiimdeý óte mańyzdy", – dedi Toqaev.
Sonymen qatar Prezident quryltai músheleriniń qoǵamdaǵy alaiaqtyq áreketterge qatysty alańdaýshylyǵyn da qoldaitynyn jetkizdi.
"Qaiyrymdylyqty jeleý etip, halyqtan aqsha jinap, ony óz paidasyna jumsaityn adamdar kóbeiip ketti. Sondai-aq internet-alaiaqtyqtyń órshýi de alańdatady. Budan bólek, halyqqa aqyl aityp, psihologiialyq kómek usynamyn dep, paida kózdeitin jalǵan psihologtar men "koýchtar" sany artyp keledi. Olarǵa senip, aldanyp qalǵan azamattardan kóptegen shaǵym túsip jatyr. Bul máseleni quryltai múshesi Aigúl Orynbek oryndy kóterdi. Jaýapty organdar ony erekshe baqylaýǵa alýy tiis", – dedi Memleket basshysy.
