Almaty qalasy boiynsha Memlekettik kirister departamenti politsiia basqarmasy qyzmetkerlerimen birlesip avtokólikterge salynatyn salyq boiynsha bereshekterdi óndirip alý úshin "Boryshker" jedel-aldyn alý is-sharasyna kiristi, dep habarlaidy Dalanews.kz.
"Jeke sot oryndaýshylarynyń qaýlysy shyqqan boryshkerlerdiń avtokólikteri "Sergek" kameralarynyń kómegimen anyqtalyp, bereshegi tolyq ótelgenge deiin aiyppul turaǵyna qoiylady. Búgingi tańda kólik quraldaryna salynatyn salyq boiynsha bereshek 3,7 mlrd teńgeni quraidy. Bereshektiń negizgi bóligi qozǵaltqysh kólemi 4000 tekshe sm-den asatyn avtokólikterge tiesili",- dep naqtylaidy departamenttegiler.
Reid kezinde beresheginiń jalpy somasy 1,6 mln teńgeni qamtityn 12 kólik ieleri tólem jasady, al toǵyz kólik aiyppul turaǵyna qoiyldy.
Kólik salyǵyn tóleý boiynsha berilgen merzim 1 sáýirde aiaqtalatynyn eske sala ketelik.
Aita ketsek, 2025 jyldyń qańtarynda Qyrǵyzstan prezidenti Sadyr Japarov avtokólikke salynatyn salyqtyń kúshin joiý týraly Jarlyqqa qol qoidy.
