"Ekonomikanyń barlyq salasyna tsifrlyq tehnologiialardyń engizilýi elimizdiń básekege qabiletin arttyratyn eń basty faktor bolýǵa tiis. Bul jerde tsifrlyq aktivter indýstriiasy men blokchein tehnologiiasyn damytý mańyzdy ról atqarady". Býrabaida ótip jatqan Ulttyq quryltaidyń IV otyrysynda osylai degen Memleket basshysy Qasym-Jomart Toqaev qazirgi zamanda ekonomika innovatsiiaǵa negizilýi kerek ekenin eske saldy, dep habarlaidy Dalanews.kz.
"Tsifrlyq aktivterdiń zańdy ainalymyn qamtamasyz etý, kriptoaiyrbastaý qyzmetin júrgizý jáne tsifrlyq mainingke investitsiia tartý úshin osy salany retteý isin yryqtandyrýdyń shuǵyl sharalaryn qabyldaý qajet. Bul qadam elimizdiń osy aimaqtaǵy tsifrlyq qarjy tehnologiialarynyń ortalyǵy retindegi rólin arttyrady. Sondai-aq, tsifrlyq aktivterdiń kóleńkeli ainalymyn azaitýǵa múmkindik beredi ári salyq túsimin kóbeitýge septigin tigizedi", - dedi Memleket basshysy.
Bul rette Prezident qazirgi zamanda ekonomika innovatsiiaǵa negizdelýi kerektigin aita kele, Alataý innovatsiialyq tehnologiialyq parki men Kýrchatov qalasyn da sóz etti.
"Biz ǵylymdy damytý, sonyń ishinde qoldanbaly zertteýler júrgizý úshin kóp jumys istep jatyrmyz. Ǵylymi jańalyqtardy kommertsiialandyrýǵa, ǵylym men óndiristiń bailanysyn kúsheitýge basa mán berilip otyr. Degenmen Qazaqstanda áli kúnge deiin birde bir ǵylym qalashyǵy joq. Almaty irgesindegi "Alataý" innovatsiialyq tehnologiialar parkiniń aýmaǵynda ǵylym qalashyǵyn qurý týraly ideia bar ekenin bilemin. Úkimet osy bastamany jan-jaqty zerdelep, tiisti zań daiyndaýy kerek. Ǵalymdardyń pikirinshe, tiisti dástúri men tájiribesi bar Kýrchatov qalasy ekinshi ǵylym qalashyǵy bola alady. Biraq mynany eskertkim keledi: osy jospardyń bári shynaiy esep-qisapqa jáne tabandy jumysqa negizdelýge tiis. Kózboiaýshylyq pen kópirme sózge ábden toidyq. Suraýy qatty bolady", - dedi Qasym-Jomart Toqaev.
