Onda aýrýdyń aldyn-alý sharalary týraly da aityldy, dep habarlaidy elorda ákimdiginiń resmi saity.
Elordada meningitpen aýyrǵan naýqastyń jaǵdaiy týraly ana men bala densaýlyǵyn saqtaý salasyna jaýapty Nur-Sultan qalalyq Qoǵamdyq densaýlyq saqtaý basqarmasy basshysynyń orynbasary Maǵripa Embergenova aityp berdi.
«Meningit eki túrge bólinedi, ádette virýstyq infektsiiadan týyndaityn sirli meningit jeńilirek ótip, naýqas odan tolyqtai aiyǵady. Sondai-aq, bakteriialardyń áserinen týyndaityn irińdi meningit te bolady. Onyń saldary anaǵurlym qiynyraq», - deidi Maǵripa Embergenova.
Onyń aitýynsha, biylǵy jyldyń 8 aiynda Nur-Sultan qalasynda virýstyq meningitpen 240 adam aýyrǵan, al bakteriialyq meningittiń 7 jaǵdaiy tirkelgen.
Osy ýaqyt aralyǵynda sirli meningit asqynyp, adam ólimine ákelgen joq. Jalpy, enterovirýstyq infektsiia - bul jyl saiyn tirkeletin maýsymdyq aýrý. Halyq sanynyń ósýine jáne aýrý úshin qolaily kezeńge qaramastan, onyń kórsetkishteri turaqty.
"Osyǵan bailanysty, qaladaǵy eshbir nysanda shekteý sharalary engizilmeidi, aýrý maýsymy qarashaǵa deiin jalǵasady", - dedi ol.
Astana meditsina ýniversitetiniń balalar juqpaly aýrýlary kafedrasynyń meńgerýshisi, meditsina ǵylymdarynyń doktory, professor Dinagúl Baesheva meningittiń belgileri, aýrýdyń aǵymy týraly aityp berdi.
«Meningit JRVI klinikasyn bere alady (jótel, qyzýdyń kóterilýi, murynnyń bitelýi), bulshyq etterde, ishte aýyrsyný sezimi bolýy múmkin, ol kóbinese appenditsit belgilerin berip, midyń jumsaq qabyǵy da qosylýy múmkin. Meningit kezinde tamaq isip, dene bórtýi múmkin. Bórtpeniń ózine tán ereksheligi bolady: 3-4-shi kúni bir ýaqytta aiaq, qol, dene, bette (árqashan emes) paida bolyp, 2-3 kúnnen keiin ketip qalady. Bul aýrýdyń maýsymy - jaz jáne kúz merzimi. Juqtyrý merzimi 2 kúnnen bir aiǵa deiin sozylady. Ortasha alǵanda 1-2 apta. Sodan keiin aýrý klinikasy damidy», - deidi dáriger.
Onyń aitýynsha, balalar úshin qaýipti negizgi infektsiia kózi - sýburqaqtar (jas balalar oinap júrgende sýdy jutyp, infektsiiany juqtyrady) men jýylmaǵan kókónister, jidekter men jemister. «Máselen, eresekter infektsiiany juqtyryp, ózderi baiqamai júre beredi, al balalar tez aýyrady, ásirese balanyń immýndyq júiesine qarai 10-12 jasqa deiingi balar kóp aýrady», - dep tolyqtyrdy professor.
Dárigerlerdiń pikirinshe, birinshi kezekte ata-analar muqiiat bolyp, jaýapkershilikpen qaraý kerek, eger bala tolyq emdelmegen bolsa, ony úide tolyqtai emdep, mektepke nemese balabaqshaǵa jibermegen jón.
