Qazaqstandyq shahmatshy Bibisara Asaýbaevanyń anasy Liana Hakim qyzyna bólinetin qarjy kólemine qatysty pikir bildirdi, dep habarlaidy Dalanews.kz.
Onyń aitýynsha, keiingi kúnderi áleýmettik jelide Bibisaraǵa bólingen qarajat týraly túrli málimet taraǵan. Alaida bul sandar tolyq kórinisti ashpaitynyn jetkizdi.
"Tórt jyl ishinde Bibisaraǵa 847 myń dollar bólindi degen aqparat tarady. Biraq onyń ishinde jalaqy joq. Federatsiia sportshylarǵa ai saiyn jalaqy tólemeidi. Tek nátije kórsetken jaǵdaida ǵana syiaqy beriledi", – dedi ol.
Liana Hakimniń sózinshe, jalpy bólingen 388 mln teńgeniń basym bóligi tikelei sportshyǵa emes, jattyqtyrýshylarǵa ketken.
"315 mln teńge grant retinde kórsetilgen. Biraq bul qarajat bizge berilmeidi. Ol jattyqtyrýshylarǵa tikelei Federatsiia arqyly tólenedi. Salyqtan keiin bul soma 220 mln teńgeni quraidy", – dedi ol.
Sondai-aq júldeli oryndar úshin berilgen syiaqylardyń da naqty kólemin atady.
"Syiaqylardyń jalpy somasy - 73 mln teńge. Salyq shegerilgennen keiin bizge 58 mln teńge ǵana tiedi. Jalpy alǵanda, tórt jylda qolǵa tigeni - 278 mln teńge", – dedi Hakim.
Ol bul qarjynyń qalai bólinetinin naqtylaý qajet ekenin atap ótti.
"Tórt jyl ishinde jattyqtyrýshylarǵa shamamen 440 myń dollar tólengen. Al syiaqylar - 120 myń dollar. Bul jerde taǵy bir suraq týyndaidy. Federatsiiaǵa tórt jylda bólingen 30 mln dollar qaida jumsaldy?", – dep saýal tastady ol.
Sondai-aq Hakim quramanyń basqa músheleriniń nátijesine de nazar aýdardy.
"Múmkin, qarjylandyrýdyń osyndai bólinisi saldarynan basqa sportshylarymyz joǵary nátijege jete almai júrgen shyǵar", – dep qosty ol.
Qazirgi tańda Qazaqstan shahmat federatsiiasy bul málimdemege qatysty resmi túsinikteme bergen joq.
