قازاقستاندىق شاحماتشى بيبٸسارا اساۋباەۆانىڭ اناسى ليانا حاكٸم قىزىنا بٶلٸنەتٸن قارجى كٶلەمٸنە قاتىستى پٸكٸر بٸلدٸردٸ, دەپ حابارلايدى Dalanews.kz.
ونىڭ ايتۋىنشا, كەيٸنگٸ كٷندەرٸ ەلەۋمەتتٸك جەلٸدە بيبٸساراعا بٶلٸنگەن قاراجات تۋرالى تٷرلٸ مەلٸمەت تاراعان. الايدا بۇل ساندار تولىق كٶرٸنٸستٸ اشپايتىنىن جەتكٸزدٸ.
"تٶرت جىل ٸشٸندە بيبٸساراعا 847 مىڭ دوللار بٶلٸندٸ دەگەن اقپارات تارادى. بٸراق ونىڭ ٸشٸندە جالاقى جوق. فەدەراتسييا سپورتشىلارعا اي سايىن جالاقى تٶلەمەيدٸ. تەك نەتيجە كٶرسەتكەن جاعدايدا عانا سىياقى بەرٸلەدٸ", – دەدٸ ول.
ليانا حاكٸمنٸڭ سٶزٸنشە, جالپى بٶلٸنگەن 388 ملن تەڭگەنٸڭ باسىم بٶلٸگٸ تٸكەلەي سپورتشىعا ەمەس, جاتتىقتىرۋشىلارعا كەتكەن.
"315 ملن تەڭگە گرانت رەتٸندە كٶرسەتٸلگەن. بٸراق بۇل قاراجات بٸزگە بەرٸلمەيدٸ. ول جاتتىقتىرۋشىلارعا تٸكەلەي فەدەراتسييا ارقىلى تٶلەنەدٸ. سالىقتان كەيٸن بۇل سوما 220 ملن تەڭگەنٸ قۇرايدى", – دەدٸ ول.
سونداي-اق جٷلدەلٸ ورىندار ٷشٸن بەرٸلگەن سىياقىلاردىڭ دا ناقتى كٶلەمٸن اتادى.
"سىياقىلاردىڭ جالپى سوماسى - 73 ملن تەڭگە. سالىق شەگەرٸلگەننەن كەيٸن بٸزگە 58 ملن تەڭگە عانا تيەدٸ. جالپى العاندا, تٶرت جىلدا قولعا تيگەنٸ - 278 ملن تەڭگە", – دەدٸ حاكٸم.
ول بۇل قارجىنىڭ قالاي بٶلٸنەتٸنٸن ناقتىلاۋ قاجەت ەكەنٸن اتاپ ٶتتٸ.
"تٶرت جىل ٸشٸندە جاتتىقتىرۋشىلارعا شامامەن 440 مىڭ دوللار تٶلەنگەن. ال سىياقىلار - 120 مىڭ دوللار. بۇل جەردە تاعى بٸر سۇراق تۋىندايدى. فەدەراتسيياعا تٶرت جىلدا بٶلٸنگەن 30 ملن دوللار قايدا جۇمسالدى?", – دەپ ساۋال تاستادى ول.
سونداي-اق حاكٸم قۇرامانىڭ باسقا مٷشەلەرٸنٸڭ نەتيجەسٸنە دە نازار اۋداردى.
"مٷمكٸن, قارجىلاندىرۋدىڭ وسىنداي بٶلٸنٸسٸ سالدارىنان باسقا سپورتشىلارىمىز جوعارى نەتيجەگە جەتە الماي جٷرگەن شىعار", – دەپ قوستى ول.
قازٸرگٸ تاڭدا قازاقستان شاحمات فەدەراتسيياسى بۇل مەلٸمدەمەگە قاتىستى رەسمي تٷسٸنٸكتەمە بەرگەن جوق.
