"Meniń oiymsha, balabaqshada, bastaýysh mektepte aǵylshyn tilin múlde oqytpaý kerek. Latyn jazýyna negizdelgen qazaq sózderin saýatty jazyp, oqyp daǵdylana qoimaǵan balaǵa aǵylshyn tilin úiretýge bolmaidy. Tildik sanada aǵylshyn tiliniń áripteri saqtalyp qalǵan balalar keiin qazaq tilin úirengen kezde ol tańbanyń basqasha dybystalatynyn qabyldai almai, shatastyratyn bolady.
Bala bastaýysh mektepte qazaq tili boiynsha saýatty jazyp, ábden daǵdylanǵan soń ǵana shet tilderdi úiretýge bolady. Mektep tabaldyryǵyn attaǵan bala ana tilinde ǵana sóileýi kerek. Bala bastaýyshta orys tilinde de emes, aǵylshyn tilinde de emes, tek qana ana tilinde oqýy kerek.
Úsh tildi birden oqytqanda balanyń ana tili bolmaidy.
Ana tili bolmaǵan adamnan eshqandai aqyn da, jazýshy da, sýretshi de shyqpaidy. Ǵalym shyǵar, maman shyǵar, tipti ataqty adam da shyǵar. Biraq onda eshqandai mádeni azyq bolmaidy. Aǵylshyn tilinde tamasha jazsyn, orys tilinde óleń shyǵarsyn, biraq ol – ana tili emes. Sondyqtan Úkimet, basshylar, oqý-aǵartý salasyndaǵylar qazaq mektebin qolǵa alyp, qamqorlyq kórsetýi kerek. Qazaq mektebin kóbeitý kerek. Bala ana tilin bastaýysh mektepten meńgerip, keiin basqa tildi qosý kerek.
Ainalasyn ana tilinde tanyp, ár zattyń qazaqsha ataýyn bilgen soń ǵana onyń orysshasyn, aǵylshynshasyn úirenýi ońai. Qazaq halqynyń saqtalýy tiliniń saqtalýyna bailanysty. Jahandaný zamanynda ana tilimizdiń bolashaǵyna, tazalyǵyna erekshe mán berýimiz qajet".
Derekkóz: egemen.kz
