2024 jyldyń qorytyndysy boiynsha Qazaqstandaǵy barlyq bankter 2,56 trln teńge taza paida tapqan. Ulttyq Banktiń málimetinshe, jyl boiynda bank sektorynyń kórsetkishi 17,05%-ǵa nemese 372,3 mlrd teńgege ósti. Qazaqstannyń bank sektorynyń taza paidasyndaǵy negizgi úlesti Halyk (844,8 mlrd teńge) jáne Kaspi (530,8 mlrd teńge) bankter quraidy. Olardyń tabysy 2024 jyly búkil sektordaǵy kiristiń jartysynan kóbin qamtidy (53,83%). Ósimniń negizgi draiveri retinde marketpleisterdiń aty atalady. Búgingi maqalamyzda "medaldyń arǵy beti", iaǵni bankter usynatyn osy internet-dúken qyzmetiniń sapasyn eksheitin bolamyz, dep habarlaidy Dalanews.kz.
Kaspi.kz 2024 jyly marketpleistiń arqasynda qansha tabysqa keńeldi?
Halyk Bank ósimdi, negizinen kreditteý salasynan arttyrsa, al Kaspi Bank tabysynyń negizgi draiveri marketpleist bolyp tabylady eken. Iá, atalǵan bank 2014 jyldan bastap halyqqa Kaspi.kz qosymshasy arqyly qarjylyq qyzmetter men taýarlardyń onlain saýdasyn usyna bastady. Ózgelerge qaraǵanda bul qyzmet túriniń munda qarqyndy damýyna banktiń tutynýshylarǵa taýardy bólip satyp alýǵa múmkindik beretin Kaspi Red, sol sekildi Kaspi Gold karta baǵdarlamasyn birinshi bolyp ainalymǵa engizýi túrtki bolýy yqtimal.
2024 jyldyń qorytyndysy boiynsha, Kaspi.kz-daǵy GMV nemese jalpy taýar ainalym kólemi 44%-ǵa, satylǵan taýarlar kólemi 42%-ǵa, al e-Commerce segmentindegi kórsetkish 85%-ǵa ósken. Al Kaspi Delivery arqyly berilgen tapsyrystar sany 99 millionǵa (!) jetipti, olardyń jartysynan kóbi - Kaspi Postomats-qa tiesili.
2025 jyly Kaspi osy baǵyttaǵy taza tabysyn 20%-ǵa arttyrýǵa nietti.
Marketpleiste tutynýshylar quqyǵy qorǵalmaityny ras pa?
Halyqtyń keńinen qoldanysyna ie Kaspi Bank-tiń kóptegen taýarlar men qyzmetterdi usynatyn Kaspi.kz qosymshasyna qatysty qandai máseleler bar? Biz osyny anyqtaý maqsatynda internette kópshilikke qoljetimdi 2Gis qosymshasynda bank meken-jaiy berilgen tusta qaldyrylǵan aryzdardy súzip kórdik. Odan uqqanymyz, bul aradaǵy tutynýshylardyń eń birinshi máselesi – sapasyz taýardy keri qaitara almaý. Bir mysal keltire ketelik. Serik Iskakov degen tutynýshy bylai dep jazady:
"Óz basymnan alǵan sabaǵym: 1. Kaspi tutynýshylar quqyǵyn qorǵamaidy. 2. Daýly jaǵdai týyndaǵanda satýshy jaǵyna shyǵyp ketedi. 3. Taýardyń jaǵdaiyn tirkegen video dálel retinde ról atqarmaidy. 4. Marketpleist óz satýshylaryn alaiaqtyqqa qatysty tekserip jatpaidy. Tutynýshylarǵa berer keńesim: qatty qajettilik bolmasa, taýardy qoldan alǵan durys. Áitpese, kórmei alǵan sapasyz taýarǵa Kaspi jaýap bermeidi, satýshymen betpe-bet ózińiz ǵana qalasyz. Al Kaspi-diń jumysy – nesie nemese bólip tóleý boiynsha tólemderdi alý ǵana, tutynýshylar quqyǵy olardy qyzyqtyrmaidy".
Mynandai tabys bar jerdi alaiaqtar, árine nazardan qalai tys qaldyrsyn? Sondyqtan taýar nemese qyzmet túrin satyp alamyn dep, aqyry sot jaǵalap júrgenderdiń de munda qarasy barshylyq eken.
"Alaiaqtardyń apany. Maǵan alaiaq-sybailastarymen qyzmetti bólip tóleýdi tirketti. Aqyry balam oqýsyz qaldy, al bólip tóleý boiynsha áli tólem jasap júrmin" dep jazypty 2025 jyldyń 4 naýryzynda A7 belgisimen tirkelgen tutynýshy.
Onlain-dúkendegi satýshylardy narazy etetin ne jaǵdai
Al myna satýshy taraptyń aryz-shaǵymy:
"...Satýshy sýretke aqshasyn shyǵaryp, sapaly kartochka ázirleidi, sipattamasyn toltyrady, jarnama jasaidy, sóitip reitingisin kóteredi. Sodan soń ne bolady deisiz be? Qalai kartańyz topqa shyǵady, solai satýshylar qaptap ketedi de baǵany túsiredi, reitingińdi de byt-shyt qylady, sodan soń "taiyp" turady. Bir kartochka bolsa, jaraidy deisiz ǵoi. Osydan keiin "nemenege shyǵyndanyp, ony jasaimyn, eger ózgeniń kartochkasyn paidalaný múmkindigi bolsa" dep oilaisyń. Ony kim jasap, ter tókkenine túkirgenim bar, tabys tabamyn da, al kartochka óz áleýetin túgeskende ózgesine aýysa salamyn! Endi salystyryp kóreiikshi, ózge marketpleisterde – ádemi, jaqsy jasalǵan kartochkalar, al Kaspiidegini aitýǵa aýzym barmaidy. Demping degen óz aldyna bólek másele. Bir bilgish baǵany túsirgeni sonsha shyǵynǵa ketedi, árine tutynýshylardyń barlyǵy soǵan lap qoiady. Aqyrynda ol: "myna aradan paida tappaidy ekensiń" dep ketip tynady. "Ketti, boldy" deiin deseń, týra sondai taǵy bir bilgish kelip turady ǵoi baǵany túsirip. Saldarynan osyndai "bilgishterdiń" kesirinen barlyq satýshy zardap shegedi. Qandai sapaly, qandai tamasha baǵa qoisań da – jaqsy satýshy iri óńirge jaqyndar bolyp tabylady. Onyń ústine taǵy bir aqylǵa qonymsyz jait – taýar ataýynyń ornyna ARTIKÝL qoiý. Taýar atyn jazyńyz deseń, "brendti tirket" dep shyǵady. Maida-shúide satýshylarǵa óz brendin tirketip ne keregi bar? Bul qymbat ári uzaq ýaqytta sheshiletin nárse" depti ishindegi ókpe-renishin aqtarǵan satýshy Sergei Komarovskii.
Taǵy bir satýshy Kaspi Pay eseptiligine qatysty salmaqty suraq qoiypty.
"Kaspi Pay esep júiesine qatysty meniń birneshe suraǵym bar: 1) V Z-esebinde kún boiynda kelip túsken chekterdi bólshektep, eksheý qarastyrylmaǵan. 2) 910 úlgisindegi esepti ótkizýde soma avtomatty túrde shyǵady, al ol shamamen alynǵan tsifr, osy jaǵynan alǵanda eseptiliktiń týralyǵyna kúmán keledi. 3) Operator osy jaitty durystap túsindirip bere almady: atalǵan soma 3% esebine arnalǵan baza deidi, biraq qopara kelgende, báribir onyń shamamen alynǵany anyqtalady. 4) kontragentten kelip túsken tólemderdi ekshelep kórsetetin esep joqtyń-qasy. Iaǵni, kelip túsken qolma-qol aqsha qansha, QR arqylysy she nemese oqshaý jasalǵan tólem qansha, sony bile almaisyz. Sodan kelip, jarty jyldyqtyń jalpy somasyn shyǵarý úshin birneshe esepti qopara otyryp, aqparattardy súzýge týra keledi. Osynyń barlyǵy eseptiń ashyqtyǵyna selkeý túsirip, qarjylyq esep júrgizýdi qiyndatady" dep jazypty 10 aqpanda One Week belgisindegi qoldanýshy.
Sondai-aq mynandai bir tilekti de kózimiz shalyp qaldy:
"Kaspi, ókinishke qarai, Wallet qosymshasy arqyly qoljetimdi NFC-tólemin engizbegen. Tutynýshylar úshin qolaisyzdaý. Bizde joq emes, mundai múmkindikterdi basqa bankterden kezdestirýge bolady. Sondyqtan osyndai qolaily servispen kartalary tolyqqandy jumys isteýi úshin NFC-tólemin engizse degen tilek bar" depti 18 qańtarda MK belgisindegi qoldanýshy.
Óz kezegimizde biz tutynýshylar únin jetkizýge osylaisha at salysa otyryp, marketpleistpen jumys isteitin basqa bankter de budan sabaq alsa deimiz. Sondai-aq tutynýshylarǵa búginderi Qarjy naryǵyn retteý jáne damytý agenttigi bankterge óz janynan tutynýshylar quqyǵy men múddesin qorǵaý jónindegi bólimsheler ashýdy mindettegeli jatqanyn aita ketkimiz keledi. Al bank janynda ondai bólim bolmasa, onda atalǵan agenttikte týra osyndai qyzmetti júzege asyratyn komitet baryn eske salamyz. Barlyq ótinish pen shaǵymdy sol araǵa qaldyrýǵa bolady. Muny aityp otyrǵan sebebimiz joǵarydaǵy 2Gis qosymshasyna qaldyrylǵan shaǵym ieleriniń basym bóligi qaida habarlasý kerektigin bilmei otyrǵandaryn aitqan eken.
