Rýdnyi qalasynda klientterdiń qurylǵylaryndaǵy bank qosymshalaryn buzý arqyly aqsha urlady degen kúdikpen telefon jóndeý sheberi ustaldy dep habarlaidy Dalanews.kz Qostanai oblystyq PD-ne silteme jasap.
Vedomstvonyń baspasóz qyzmetiniń habarlaýynsha, «Mobilnik» jedel aldyn alý is-sharasy aiasynda Rýdnyi qalasynyń politseileri buryn qoldanysta bolǵan uialy telefondardy jóndeý jáne satyp alýmen ainalysqan jergilikti turǵyndy ustady.
«Tergeý málimetinshe, er adam qurylǵylardy diagnostika jáne tehnikalyq qyzmet kórsetý úshin alyp, keiin banktik qosymshalarǵa zańsyz qol jetkizip, qarajatty óz shottaryna aýdaryp otyrǵan»,- dep málimdedi Qostanai oblystyq PD.
Kirý úshin qupiiasózder retinde týǵan kúnder, ieleriniń esimderi jáne basqa da ońai boljanatyn kombinatsiialar paidalanylǵan.
«Qazirgi ýaqytta kúdiktiniń úsh qylmystyq epizodqa qatysy bar ekeni dáleldendi»,- dep naqtylady vedomstvo.
Ziiannyń jalpy somasy 1 million teńgeden asty. Qazirgi ýaqytta sotqa deiingi tergeý amaldary júrgizilýde, qosymsha faktiler men jábirlenýshiler anyqtalýda.
Politsiia azamattardy kiberqaýipsizdik sharalaryn saqtaýǵa shaqyrdy:
Telefondy jóndeýshi sheberge de qulyptan bosatylǵan kúiinde bermeńiz;
Qurylǵyny tapsyrar aldynda bank qosymshalaryn óshirip, barlyq akkaýnttardan shyǵyńyz;
Jeke derekterdi qamtymaityn kúrdeli qupiiasózderdi paidalanyńyz;
Qurylǵyǵa baqylaý joǵalǵan jaǵdaida, birden bank kartalary men onlain qol jetimdilikti bank koll ortalyǵy arqyly buǵattańyz.
