Shymkent qalalyq soty qalalyq máslihattyń burynǵy depýtaty ári kásipker Qýanysh Dáýletálievke ekinshi márte izdeý jariialady. Ol QR Qylmystyq kodeksiniń "Qorlaý" babymen aiyptalyp, isi sotqa jetken edi, dep habarlaidy Dalanews.kz Otyrar.kz-ke silteme jasap.
Sot dereginshe, aiyptalýshy 1976 jyly týǵan, Shymkent qalasy Qazyǵurt shaǵynaýdanynda turady. Sot qaýlysynda:
"Dáýletáliev Qýanysh Ámirseiituly sot otyrysyna beimálim sebeptermen kelmegendikten, oǵan qatysty izdeý jariialansyn. Ustalǵan jaǵdaida sot májilisine májbúrlep jetkizilsin", — delingen.
Sot otyrysy jabyq ótken. Úkim shyǵarý kezeńine jetken istiń qaralýy aiyptalýshynyń sotqa kelmeýine bailanysty ýaqytsha toqtatyldy.
Sýdia Ashat Esenov málimdegendei, Dáýletáliev tabylǵan soń is qaita jańartylyp, qaralatyn bolady.
"Sottalýshy sotqa belgisiz sebeptermen kelmegendikten, izdeý jariialanady. Qylmystyq is toqtatyldy, ol ustalǵan soń is qaita qaralady", — dedi sýdia.
Jábirlenýshi Eskendir Jambaevtyń aitýynsha, burynǵy depýtat ony balaǵattap, ar-namysyna tiip, qorqytqan.
"Ol meni balaǵattap, qorqytyp, namysyma tietin sózder aitty. Buǵan deiin onyń eki balasyna qatysty alaiaqtyq deregi boiynsha aryz túsirgenmin. Sot olardy kináli dep tanydy. Sodan keiin Dáýletáliev jeke kek saqtaǵan siiaqty", - deidi jábirlenýshi.
Aiyptalýshyny izdestirý sharalaryn uiymdastyrý prokýratýraǵa, al qaýlyny oryndaý politsiiaǵa júkteldi. Eks-depýtatqa izdeý jariialanǵany týraly aqparat Quqyqtyq statistika jáne arnaiy esepke alý komitetiniń resmi portalynda 2 qyrkúiekte jariialanǵan.
Belgili bolǵandai, Qýanysh Dáýletáliev buǵan deiin Shymkent qalalyq máslihatynyń depýtaty ári «Aýyl» partiiasynyń múshesi bolǵan. Resmi málimetterge sai, mamandyǵy — zańger, biraq sońǵy 25 jyl boiy kásipkerlikpen ainalysqan. Máslihatta «Aýyl» partiiasynyń depýtattyq fraktsiiasyn basqarǵan.
