شىمكەنت قالالىق سوتى قالالىق ءماسليحاتتىڭ بۇرىنعى دەپۋتاتى ءارى كاسىپكەر قۋانىش داۋلەتالييەۆكە ەكىنشى مارتە ىزدەۋ جاريالادى. ول ق ر قىلمىستىق كودەكسىنىڭ "قورلاۋ" بابىمەن ايىپتالىپ، ءىسى سوتقا جەتكەن ەدى، دەپ حابارلايدى Dalanews.kz Otyrar.kz-كە سىلتەمە جاساپ.
سوت دەرەگىنشە، ايىپتالۋشى 1976 جىلى تۋعان، شىمكەنت قالاسى قازىعۇرت شاعىناۋدانىندا تۇرادى. سوت قاۋلىسىندا:
"داۋلەتالييەۆ قۋانىش امىرسەيىت ۇلى سوت وتىرىسىنا بەيمالىم سەبەپتەرمەن كەلمەگەندىكتەن، وعان قاتىستى ىزدەۋ جاريالانسىن. ۇستالعان جاعدايدا سوت ماجىلىسىنە ماجبۇرلەپ جەتكىزىلسىن"، — دەلىنگەن.
سوت وتىرىسى جابىق وتكەن. ۇكىم شىعارۋ كەزەڭىنە جەتكەن ءىستىڭ قارالۋى ايىپتالۋشىنىڭ سوتقا كەلمەۋىنە بايلانىستى ۋاقىتشا توقتاتىلدى.
سۋديا اسحات ەسەنوۆ مالىمدەگەندەي، داۋلەتالييەۆ تابىلعان سوڭ ءىس قايتا جاڭارتىلىپ، قارالاتىن بولادى.
"سوتتالۋشى سوتقا بەلگىسىز سەبەپتەرمەن كەلمەگەندىكتەن، ىزدەۋ جاريالانادى. قىلمىستىق ءىس توقتاتىلدى، ول ۇستالعان سوڭ ءىس قايتا قارالادى"، — دەدى سۋديا.
جابىرلەنۋشى ەسكەندىر جامبايەۆتىڭ ايتۋىنشا، بۇرىنعى دەپۋتات ونى بالاعاتتاپ، ار-نامىسىنا ءتيىپ، قورقىتقان.
"ول مەنى بالاعاتتاپ، قورقىتىپ، نامىسىما تيەتىن سوزدەر ايتتى. بۇعان دەيىن ونىڭ ەكى بالاسىنا قاتىستى الاياقتىق دەرەگى بويىنشا ارىز تۇسىرگەنمىن. سوت ولاردى كىنالى دەپ تانىدى. سودان كەيىن داۋلەتالييەۆ جەكە كەك ساقتاعان سياقتى"، - دەيدى جابىرلەنۋشى.
ايىپتالۋشىنى ىزدەستىرۋ شارالارىن ۇيىمداستىرۋ پروكۋراتۋراعا، ال قاۋلىنى ورىنداۋ پوليسياعا جۇكتەلدى. ەكس-دەپۋتاتقا ىزدەۋ جاريالانعانى تۋرالى اقپارات قۇقىقتىق ستاتيستيكا جانە ارنايى ەسەپكە الۋ كوميتەتىنىڭ رەسمي پورتالىندا 2 قىركۇيەكتە جاريالانعان.
بەلگىلى بولعانداي، قۋانىش داۋلەتالييەۆ بۇعان دەيىن شىمكەنت قالالىق ءماسليحاتىنىڭ دەپۋتاتى ءارى «اۋىل» پارتياسىنىڭ مۇشەسى بولعان. رەسمي مالىمەتتەرگە ساي، ماماندىعى — زاڭگەر، ءبىراق سوڭعى 25 جىل بويى كاسىپكەرلىكپەن اينالىسقان. ءماسليحاتتا «اۋىل» پارتياسىنىڭ دەپۋتاتتىق فراكسياسىن باسقارعان.
