Túrkistan oblysynda tórt jasar bala der kezinde meditsinalyq kómek ala almaǵan soń komaǵa tústi. Ata-anasynyń aitýynsha, kezekshi dáriger túngi ýaqytta uiyqtap jatqan, al aýdandyq aýrýhanada qajetti qurylǵy bolmaǵan, dep habarlaidy Dalanews.kz "Jetinshi arnaǵa" silteme jasap.
Balaqaidyń ata-anasy keshke balabaqshadan keiin onyń dene qyzýy kóterilip, túnde tyrysý bastalǵanyn aitty. Qorqyp ketken ata-anasy jedel járdem shaqyryp, tańǵy saǵat 3:30 shamasynda aýrýhanaǵa jetkizilgen. Alaida ákesiniń aitýynsha, dárigerler balany qabyldaýǵa asyqpaǵan.
«Ol jai ǵana jatty. Biz túngi úsh jarymda keldik. Medbike qabyldady, ózi keri qaitaryp jibergisi keldi. Bir saǵattan keiin qaitadan tyrysý bastaldy. “Dáriger kelsin, dáriger kelsin” dep qaitalai berdi. Tek muryn arqyly ottegi berdi, basqa eshteńe istemedi. Keiin politsiiada túsinikteme alǵanda, dáriger uiyqtap jatqanyn, medbike ony úsh ret oiatýǵa barǵanyn aitty. Bul – dárigerler tarapynan nemquraidylyq dep esepteimin», – dedi balanyń ákesi.
Ata-anasynyń aitýynsha, balany alǵash ret tek saǵat 9:00-de, iaǵni aýrýhanaǵa kelgennen alty saǵattan keiin ǵana qaraǵan. Sol ýaqytqa deiin balanyń ishi qatty aýyryp, keiin esinen tanyp qalǵan.
«Búginge deiin aitatyny – “jaǵdaiy aýyr”. “Ne istep jatyrsyzdar?” dep surasam eshkim jaýap bermeidi. Barlyǵy “aýyr” dep qana aitady. Apparattar joq, analiz alynbaǵan. Tek dúisenbiden bastap birdeńe istei bastady», – deidi anasy.
Dárigerler áli naqty diagnoz qoia almaǵan. Biri – miǵa qan quiylǵan dep boljaidy, endi biri infektsiia bolýy múmkin deidi. Al aýrýhana basshylyǵy qajetti jabdyqtyń joq ekenin moiyndaǵan.
«Aýdandyq aýrýhanada kompiýterlik tomograf joq. Al balany oblystyq aýrýhanaǵa aparýǵa dárigerler táýekel etpei otyr, sebebi jol ústinde jaǵdaiy nasharlap ketýi múmkin», – delingen habarlamada.
Arys aýdandyq aýrýhanasynyń bas dárigeri Marat Tólegenov ata-ananyń málimdemesi tekserilip jatqanyn aitty. Onyń sózinshe, kezekshi dáriger ol túni jumys istegen.
«Ol túni aýrýhanaǵa 35 naýqas júgingen. Sondyqtan dáriger 6 saǵat boiy uiyqtap jatqan degen sóz shyndyqqa janaspaidy. Kezekshi dáriger basqa naýqastardy qarap júrgenin aitty. Qazir onyń is-áreketine qatysty qyzmettik tekseris júrgizilip jatyr», – dedi Tólegenov.
Alirahman esimdi balanyń ata-anasy Arysqa bilikti mamandardy jiberýdi jáne jaǵdaidy Densaýlyq saqtaý ministrligi jeke baqylaýǵa alýyn talap etti. Olardyń aitýynsha, balanyń jaǵdaiy áli de óte aýyr.
