تۇركىستان وبلىسىندا ءتورت جاسار بالا دەر كەزىندە مەديسينالىق كومەك الا الماعان سوڭ كوماعا ءتۇستى. اتا-اناسىنىڭ ايتۋىنشا، كەزەكشى دارىگەر تۇنگى ۋاقىتتا ۇيىقتاپ جاتقان، ال اۋداندىق اۋرۋحانادا قاجەتتى قۇرىلعى بولماعان، دەپ حابارلايدى Dalanews.kz "جەتىنشى ارناعا" سىلتەمە جاساپ.
بالاقايدىڭ اتا-اناسى كەشكە بالاباقشادان كەيىن ونىڭ دەنە قىزۋى كوتەرىلىپ، تۇندە تىرىسۋ باستالعانىن ايتتى. قورقىپ كەتكەن اتا-اناسى جەدەل جاردەم شاقىرىپ، تاڭعى ساعات 3:30 شاماسىندا اۋرۋحاناعا جەتكىزىلگەن. الايدا اكەسىنىڭ ايتۋىنشا، دارىگەرلەر بالانى قابىلداۋعا اسىقپاعان.
«ول جاي عانا جاتتى. ءبىز تۇنگى ءۇش جارىمدا كەلدىك. مەدبيكە قابىلدادى، ءوزى كەرى قايتارىپ جىبەرگىسى كەلدى. ءبىر ساعاتتان كەيىن قايتادان تىرىسۋ باستالدى. “دارىگەر كەلسىن، دارىگەر كەلسىن” دەپ قايتالاي بەردى. تەك مۇرىن ارقىلى وتتەگى بەردى، باسقا ەشتەڭە ىستەمەدى. كەيىن پوليسيادا تۇسىنىكتەمە العاندا، دارىگەر ۇيىقتاپ جاتقانىن، مەدبيكە ونى ءۇش رەت وياتۋعا بارعانىن ايتتى. بۇل – دارىگەرلەر تاراپىنان نەمقۇرايدىلىق دەپ ەسەپتەيمىن»، – دەدى بالانىڭ اكەسى.
اتا-اناسىنىڭ ايتۋىنشا، بالانى العاش رەت تەك ساعات 9:00-دە، ياعني اۋرۋحاناعا كەلگەننەن التى ساعاتتان كەيىن عانا قاراعان. سول ۋاقىتقا دەيىن بالانىڭ ءىشى قاتتى اۋىرىپ، كەيىن ەسىنەن تانىپ قالعان.
«بۇگىنگە دەيىن ايتاتىنى – “جاعدايى اۋىر”. “نە ىستەپ جاتىرسىزدار؟” دەپ سۇراسام ەشكىم جاۋاپ بەرمەيدى. بارلىعى “اۋىر” دەپ قانا ايتادى. اپپاراتتار جوق، اناليز الىنباعان. تەك دۇيسەنبىدەن باستاپ بىردەڭە ىستەي باستادى»، – دەيدى اناسى.
دارىگەرلەر ءالى ناقتى دياگنوز قويا الماعان. ءبىرى – ميعا قان قۇيىلعان دەپ بولجايدى، ەندى ءبىرى ينفەكسيا بولۋى مۇمكىن دەيدى. ال اۋرۋحانا باسشىلىعى قاجەتتى جابدىقتىڭ جوق ەكەنىن مويىنداعان.
«اۋداندىق اۋرۋحانادا كومپيۋتەرلىك توموگراف جوق. ال بالانى وبلىستىق اۋرۋحاناعا اپارۋعا دارىگەرلەر تاۋەكەل ەتپەي وتىر، سەبەبى جول ۇستىندە جاعدايى ناشارلاپ كەتۋى مۇمكىن»، – دەلىنگەن حابارلامادا.
ارىس اۋداندىق اۋرۋحاناسىنىڭ باس دارىگەرى مارات تولەگەنوۆ اتا-انانىڭ مالىمدەمەسى تەكسەرىلىپ جاتقانىن ايتتى. ونىڭ سوزىنشە، كەزەكشى دارىگەر ول ءتۇنى جۇمىس ىستەگەن.
«ول ءتۇنى اۋرۋحاناعا 35 ناۋقاس جۇگىنگەن. سوندىقتان دارىگەر 6 ساعات بويى ۇيىقتاپ جاتقان دەگەن ءسوز شىندىققا جاناسپايدى. كەزەكشى دارىگەر باسقا ناۋقاستاردى قاراپ جۇرگەنىن ايتتى. ءقازىر ونىڭ ىس-ارەكەتىنە قاتىستى قىزمەتتىك تەكسەرىس جۇرگىزىلىپ جاتىر»، – دەدى تولەگەنوۆ.
اليراحمان ەسىمدى بالانىڭ اتا-اناسى ارىسقا بىلىكتى مامانداردى جىبەرۋدى جانە جاعدايدى دەنساۋلىق ساقتاۋ مينيسترلىگى جەكە باقىلاۋعا الۋىن تالاپ ەتتى. ولاردىڭ ايتۋىنشا، بالانىڭ جاعدايى ءالى دە وتە اۋىر.
