Jetisý oblysynda «Taza Qazaqstan» baǵdarlamasy aiasynda Respýblika kúni qarsańynda Eskeldi bi, Balpyq bi, Qablisa jyraý men Qabanbai batyrǵa arnalǵan eskertkishterdi jóndeý jumystary aiaqtaldy. Bul eskertkishter Taldyqorǵan qalasynda ornatylǵan. Sonymen qatar oblys ortalyǵynda jańa skver paidalanýǵa berildi, dep habarlaidy Dalanews.kz.
Buǵan deiin qazan aiynyń basynda oblys ákimi Beibit Isabaev qalany aralaý barysynda Eskeldi bi, Balpyq bi men Qablisa jyraýǵa arnalǵan «Úsh ata» eskertkishin qalpyna keltirý jumystaryna qatysty birqatar eskertpeler aitqan bolatyn. Munan keiin merdiger uiym tarapynan tiisti sharalar qabyldandy, atap aitqanda brýschatkalar aýystyrylyp, satynyń granit tastary qaitadan tóseldi. Músinniń boiaýy jańartyldy, eskertkishtiń mańaiy abattandyryldy, jaryq shamdary ornatyldy.
Sol siiaqty Qabanbai batyr eskertkishiniń de granit qaptamalary aýystyrylyp, jazbalary jańǵyrtyldy, monýmenti men oryndyqtar boialdy.
Atqarylǵan jumystardyń sapasymen qala ákimi Ernat Bázil jáne ardagerler men Qoǵamdyq keńes músheleri tanysty. Ardagerler mádeni muralarymyzdy saqtaýdyń mańyzy zor ekenin tilge tiek etip, eskertkishterdi jańǵyrtqan qurylysshylarǵa rizashylyǵyn bildirdi.
- Ata-babalarymyzǵa qurmet kórsetý – bizdiń qasietti boryshymyz. Ata-baba murasyn nasihattap, elimizdiń tarihyn tereńirek tanyp-bilýimiz qajet, - dedi ardager jýrnalist, «Alash» syilyǵynyń iegeri Ámire Árin.
Atap ótsek, oblysta jyl basynan beri Uly Otan soǵysy ardagerleriniń qurmetine arnalǵan 112 eskertkish aǵymdaǵy jóndeýden ótkizilgen.
Osy kúni oblys ortalyǵynyń «Birlik» shaǵyn aýdanynda 0,62 ga bolatyn jańa skver paidalanýǵa berildi. Onda avtomatty sýarý júiesi, jaryq shamdary ornatylyp, gazon tóselgen. Átkenshekter, oryndyqtar, besedkalar, balalar oiyn alańy bar. Osy skverde kúzgi ýaqytta 175 japyraqty jáne qylqan japyraqty aǵash egiledi dep josparlanyp otyr. Bul turǵyndar úshin qolaily demalys orny bolmaq.
«Birlik» shaǵyn aýdanynyń turǵyndary skverdiń ashylǵanyna qýanyp otyr.
- Tórt jyl buryn osynda kóship keldim. Endi úidiń janynda keremet parkimiz bar, endi ol taza aýada otyryp tynyǵýǵa bolatyn demalys ornymyz bolady. Mektep te parkke óte jaqyn ornalasqan. Turǵyndardyńál-aýqatyna kóńil bólip jatqan barsha azamattarǵa úlken alǵysymdy bildiremin, – dedi shaǵyn aýdan turǵyny Nazgúl Nurlanqyzy.
