Áleýmettik jelide Qazaqstannyń tuńǵysh prezıdenti Nursultan Nazarbaevtyń bir top búldirshinmen túsken sýreti jáne vıdeosy tarady, dep habarlaıdy Dalanews.kz.

Kadrlarda ol balalarmen birge Elbasy mýzeıin aralap júrgeni baıqalady. Nazarbaev olarmen jyly júzdesip, estelik sýretke túsken.

Aıta keteıik, Elbasy mýzeıi Astanadaǵy burynǵy rezıdensıa ǵımaratynda ornalasqan. Onda memleket qurý kezeńine qatysty tarıhı derekter, jeke zattar men syılyqtar qoıylǵan.

Eske salaıyq, jaqynda Qazaqstannyń tuńǵysh prezıdenti Nursultan Nazarbaev Astanadaǵy Ortalyq meshitte kózge túsken edi.

Vıdeony meshit azanshysy Qýanysh Seıithanov áleýmettik jelidegi paraqshasynda jarıalady. Kadrlarda Nursultan Nazarbaev kúzet qyzmetkerlerimen birge meshit ishin aralap júrgeni kórinedi.

"21 maýsymda QR tuńǵysh prezıdenti Nursultan Ábishuly Nazarbaev bas meshitke keldi", - dep jazǵan ol.

Sondaı-aq kadrlardan Nazarbaevtyń meshittegi halyqpen tildeskeni de kórinedi.

"Aman bolyńyz, denińiz saý bolsyn! Júz jasańyz!" - dep tilegen halyq vıdeoda.

Sonymen qatar buǵan deıin Nazarbaev Máskeýge de jeke shaqyrý boıynsha baryp, Reseı prezıdenti Vladımır Pýtınmen júzdesken edi. Onyń bul sapary qoǵamda túrli alyp-qashpa áńgime, kúmán-kúdik týýyna sebep boldy.

Al eks-prezıdenttiń baspasóz hatshysy Aıdos Úkibaıdyń aıtýynsha, tuńǵysh prezıdent álemniń birqatar eliniń kóshbasshylarymen telefon arqyly sóılesip, hat almasyp, keıde jeke kezdesip turady.