Astanada ákimshilik quqyq buzýshylyq jónindegi mamandandyrylǵan aýdanaralyq sot Memlekettik kirister komitetiniń (MKK) tóraǵasy Jandos Dúisembievke qatysty isti qarady, dep habarlaidy Dalanews.kz.
Is ministrdiń tirkelmegen buiryǵyna bailanysty qozǵalǵan. Atalǵan qujatqa súienip, salyq organdary kásipkerlerge tekseris júrgizip kelgen.
Kozachkov offside telegram-arnasynyń dereginshe, bul buiryq "Qyzmettik paidalaný úshin" degen belgini ielenip, qupiia aqparattar qamtylǵanymen, Ádilet ministrliginde tirkelmegen. Osy sebepti ol zańdyq kúshke ie bolmaǵan. Soǵan qaramastan, Memlekettik kirister komiteti ony jumys barysynda qoldanýdy jalǵastyrǵan.
Buzýshylyq biylǵy jyldyń alǵashqy jartysynda belgili bolǵan. Birqatar kompaniia tekseristerdiń zańdylyǵyna shaǵymdanǵannan keiin, sot qujattyń kúshin joidy. Keiin Astananyń mamandandyrylǵan ákimshilik soty Úkimet atyna zań buzýshylyqtardy joiý týraly eki jeke uiǵarym joldady.
Osydan soń Ádilet ministrligi Ákimshilik quqyq buzýshylyq týraly kodekstiń 457-baby («Normativtik quqyqtyq aktilerdi memlekettik tirkeý týraly zańnamany buzý») boiynsha Jandos Dúisembievke qatysty ákimshilik hattama toltyrdy. Alaida ol hattamaǵa qol qoiýdan bas tartyp, istiń sotta qaralýyn suraǵan.
Sot Dúisembievtiń shynynda da tirkelmegen buiryqty qoldanǵanyn anyqtap, ony ákimshilik quqyq buzýshylyq jasaǵan dep tanydy. Sheneýnikke 78 640 teńge kóleminde aiyppul salyndy.
Bul sheshim ázirge zańdy kúshine engen joq.
