Áleýmettik jeliler men messendjerlerde bala 1,5 jasqa tolǵannan keıin áıel jumyssyzdyq boıynsha áleýmettik tólem rásimdeı alatyny týraly jalǵan aqparat tarap jatyr, dep habarlaıdy Dalanews.kz.
Eńbek jáne halyqty áleýmettik qorǵaý mınıstrligi málimetinshe, mundaı habarlamalardyń avtorlary azamattarǵa alty aı boıy tólem alý úshin mansap ortalyǵynda jumyssyz retinde tirkelýdi usynady.
"Bul shemanyń zańdy negizi joq jáne ol azamattardy jańylystyrady. Qoldanystaǵy zańnamaǵa sáıkes bala kútimi boıynsha demalysta otyrǵan áıeldiń jumys orny saqtalady, sondyqtan ol jumyssyz dep tanylmaıdy. Jumyssyz mártebesi tek naqty jumys izdep júrgen jáne jumysqa kirisýge daıyn adamdarǵa beriledi", - dep jazylǵan habarlamada.
Mınıstrlik áleýmettik tólem alý maqsatynda ádeıi jalǵan málimet berý alaıaqtyq retinde baǵalanýy múmkin ekenin eskertti.
2025 jyly elimizdiń 12 óńirinde alaıaqtyq boıynsha 30-dan asa qylmystyq is qozǵalǵan. Bes óńirde 7 sot úkimi shyǵarylǵan. Tergeý barysynda azamattar áleýmettik jelilerdegi (sonyń ishinde Instagram-daǵy) jarnamalarǵa senip, áleýmettik tólemdi zańsyz alý shemalaryna tartylǵany anyqtalǵan.
Mınıstrlik jalǵan aqparatqa senbeýge shaqyrdy.
