Pavlodar soty Eńbek mobildigi ortalyǵynyń direktory Merýert Esembaevany kináli dep tanydy. Ol 2026 jylǵy 22 aqpanǵa qaraǵan túni qyzmettik Chery Tiggo 7 Pro kóligimen júrip kele jatyp, politsiianyń toqtaý týraly talabyna baǵynbaǵan, dep habarlaidy Dalanews.kz Nege.kz-ke silteme jasap.
Politsiia qyzmetkerleri ony qýyp jetip toqtatqan. Alaida áiel alkogoldik mas kúiin tekserý protsedýrasynan ótpegen.
Merýert Esembaeva – Týrizm jáne sport ministrligi Sport jáne dene shynyqtyrý isteri komiteti tóraǵasynyń orynbasary Nurlan Esembaevtyń jubaiy.
Tekserý barysynda onyń memlekettik mekemede jumys isteitini jáne resmi túrde dekrettik demalysta bolǵany anyqtalǵan. Soǵan qaramastan ol qyzmettik kólikti jeke maqsatta paidalanǵan.
Sotta Esembaeva men onyń qorǵaýshylary aiypty joqqa shyǵarýǵa tyrysqan. Olardyń aitýynsha, áieldiń densaýlyǵy nasharlap, alkotesterge úrlei almaǵan.
Alaida politseilerdiń beinejetondarynan jáne meditsinalyq tekserý ortalyǵyndaǵy kameralardan alynǵan jazbalar bul ýájdi rastamaǵan. Beinejazbalarda aiyptalýshy dárigerdiń qolyn iterip, dóreki sóilep, narkologqa «ózińiz úrlep kórińiz» dep usynys jasaǵany kórinedi.
Sonymen qatar, ol birneshe ret túsiniktemesin ózgertken: áýeli oń jaq búiiri aýyratynyn aitsa, keiin sol jaǵy aýyrǵanyn aityp, kýágerlerdi shaqyrýdy talap etken. Sondai-aq úiinde balalar kútip otyrǵanyn alǵa tartqan.
Politsiia qyzmetkerleriniń aitýynsha, kóliktiń ishinde tártipsizdik bolǵan, ashyq syra bankisi men chechil irimshigi tabylǵan.
Keiin Esembaeva jedel járdem shaqyryp, dárigerdiń kabinetinen tikelei aýrýhanaǵa ketip qalǵan. Osylaisha ol meditsinalyq tekserýden ótpegen.
Alaida sot beinejazbalardy zerttei kele, aiyptalýshy tekserýden jaltarý úshin ózin jaisyz sezingendei keiip tanytqan degen qorytyndyǵa kelgen.
Sot Merýert Esembaevany ákimshilik quqyqbuzýshylyq jasaǵany úshin kináli dep tanyp, ony 8 jylǵa kólik júrgizý quqyǵynan aiyrdy. Onyń tórt kámeletke tolmaǵan balasy bar ekenin eskerip, qamaýǵa alý jazasy qoldanylmaǵan.
Sonymen qatar sýdia A. S. Adamjanova Pavlodar oblysynyń ákimine jeke qaýly shyǵardy. Óńir basshylyǵyna bir ai ishinde dekrettik demalystaǵy qyzmetkerdiń qolyna memlekettik mekemeniń kóligi qalai berilgenin anyqtap, jaýaptylardy jaýapqa tartý tapsyryldy.
