Soltústik Qazaqstan oblysynyń Qyzyljar aýdanynda ákimdik ǵimaratyn jóndeýge 156 mln teńge bólingen, dep habarlaidy Dalanews.kz.
Goszakupturaly paraqshasynyń málimetinshe, Petropavl qalasyndaǵy BAQ ókilderi aýdan ákimdigi ǵimaratyna qatysty júrgizilgen jóndeý jumystary týraly beinematerial jariialaǵan. Videoda kórsetilgendei, ǵimarat sý tasqynynan zardap shekpegen ári aitarlyqtai jóndeýdi qajet etpeidi. Soǵan qaramastan, ákimdik 156 mln teńgege aǵymdaǵy jóndeý jumystaryn satyp alý rásimin júrgizgen.
Satyp alý qalai júrgizilgen
Jóndeý jumystary bir kózden tikelei shart jasasý tásili arqyly júzege asqan. Tapsyrys berýshi bul tásildi tótenshe jaǵdai saldaryn joiý qajettiligimen túsindirgen.
Alaida beinematerial men ashyq derekterge súiensek, bul nysanǵa qatysty naqty tótenshe jaǵdai bolmaǵan.
goszakupturaly paraqshasynyń jazýynsha, mundai negizdeme memlekettik satyp alýda jii qoldanylatyn tásilderdiń biri. Ásirese Soltústik Qazaqstan oblysynda tótenshe jaǵdai saldaryn joiý degen negizben bir kózden satyp alý tájiribesi jii kezdesedi.
Kúmán týdyratyn taǵy bir jait
Jóndeý jumystary boiynsha kelisimshart memlekettik satyp alý portalynda dál sol kúni tirkelgen jeke kásipkermen jasalǵan.
Atalǵan kásipker buǵan deiin memlekettik satyp alýlarǵa múlde qatyspaǵan. Al kelisimshartqa qol qoiylardan bir apta buryn ǵana tiisti qyzmet túrlerine bailanysty OKED kodtaryn qosqan.
Bir aptada "jóndelgen" ákimdik ǵimaraty
Eń nazar aýdararlyq jait – jóndeý jumystarynyń oryndalý merzimi.
Kelisimshartqa qol qoiylǵannan keiin bar-joǵy bir apta ishinde oryndalǵan jumystar aktisi (AVR) rásimdelgen. Mundai qysqa merzimde aýdandyq ákimdik sekildi iri ǵimaratty jóndeý sarapshylardyń pikirinshe shyndyqqa janasa bermeidi.
Prokýratýra aralasty
Bul jaǵdai BAQ-ta jariialanǵannan keiin iske prokýratýra aralasqan. Qadaǵalaý organy kelisimshartty buzý týraly uiǵarym shyǵarǵan.
Nátijesinde kelisimshart birjaqty tártippen buzylǵan.
Alaida máseleniń taǵy bir daýly tusy bar:
156 mln teńge kólemindegi josparlanǵan qarjynyń 95 mln teńgesi jetkizýshige tólenip úlgergen.
Bul qarajat tapsyrys berýshi men merdiger taraptardyń oryndalǵan jumystar aktilerine qol qoiýy arqyly aýdarylǵan.
Prokýratýranyń málimetinshe, oryndalǵan jumystar aktisine qol qoiǵan qyzmetker tártiptik jaýapkershilikke tartylady.
Aita keteiik, aktige qol qoiǵan tulǵa – aýdan ákiminiń mindetin atqarýshy.
