سولتۇستىك قازاقستان وبلىسىنىڭ قىزىلجار اۋدانىندا اكىمدىك عيماراتىن جوندەۋگە 156 ملن تەڭگە بولىنگەن، دەپ حابارلايدى Dalanews.kz.
Goszakupturaly پاراقشاسىنىڭ مالىمەتىنشە، پەتروپاۆل قالاسىنداعى ب ا ق وكىلدەرى اۋدان اكىمدىگى عيماراتىنا قاتىستى جۇرگىزىلگەن جوندەۋ جۇمىستارى تۋرالى بەينەماتەريال جاريالاعان. ۆيدەودا كورسەتىلگەندەي، عيمارات سۋ تاسقىنىنان زارداپ شەكپەگەن ءارى ايتارلىقتاي جوندەۋدى قاجەت ەتپەيدى. سوعان قاراماستان، اكىمدىك 156 ملن تەڭگەگە اعىمداعى جوندەۋ جۇمىستارىن ساتىپ الۋ ءراسىمىن جۇرگىزگەن.
ساتىپ الۋ قالاي جۇرگىزىلگەن
جوندەۋ جۇمىستارى ءبىر كوزدەن تىكەلەي شارت جاساسۋ ءتاسىلى ارقىلى جۇزەگە اسقان. تاپسىرىس بەرۋشى بۇل ءتاسىلدى توتەنشە جاعداي سالدارىن جويۋ قاجەتتىلىگىمەن تۇسىندىرگەن.
الايدا بەينەماتەريال مەن اشىق دەرەكتەرگە سۇيەنسەك، بۇل نىسانعا قاتىستى ناقتى توتەنشە جاعداي بولماعان.
goszakupturaly پاراقشاسىنىڭ جازۋىنشا، مۇنداي نەگىزدەمە مەملەكەتتىك ساتىپ الۋدا ءجيى قولدانىلاتىن تاسىلدەردىڭ ءبىرى. اسىرەسە سولتۇستىك قازاقستان وبلىسىندا توتەنشە جاعداي سالدارىن جويۋ دەگەن نەگىزبەن ءبىر كوزدەن ساتىپ الۋ تاجىريبەسى ءجيى كەزدەسەدى.
كۇمان تۋدىراتىن تاعى ءبىر جايت
جوندەۋ جۇمىستارى بويىنشا كەلىسىمشارت مەملەكەتتىك ساتىپ الۋ پورتالىندا ءدال سول كۇنى تىركەلگەن جەكە كاسىپكەرمەن جاسالعان.
اتالعان كاسىپكەر بۇعان دەيىن مەملەكەتتىك ساتىپ الۋلارعا مۇلدە قاتىسپاعان. ال كەلىسىمشارتقا قول قويىلاردان ءبىر اپتا بۇرىن عانا ءتيىستى قىزمەت تۇرلەرىنە بايلانىستى وكەد كودتارىن قوسقان.
ءبىر اپتادا "جوندەلگەن" اكىمدىك عيماراتى
ەڭ نازار اۋدارارلىق جايت – جوندەۋ جۇمىستارىنىڭ ورىندالۋ مەرزىمى.
كەلىسىمشارتقا قول قويىلعاننان كەيىن بار-جوعى ءبىر اپتا ىشىندە ورىندالعان جۇمىستار اكتىسى (اۆر) راسىمدەلگەن. مۇنداي قىسقا مەرزىمدە اۋداندىق اكىمدىك سەكىلدى ءىرى عيماراتتى جوندەۋ ساراپشىلاردىڭ پىكىرىنشە شىندىققا جاناسا بەرمەيدى.
پروكۋراتۋرا ارالاستى
بۇل جاعداي باق-تا جاريالانعاننان كەيىن ىسكە پروكۋراتۋرا ارالاسقان. قاداعالاۋ ورگانى كەلىسىمشارتتى بۇزۋ تۋرالى ۇيعارىم شىعارعان.
ناتيجەسىندە كەلىسىمشارت ءبىرجاقتى تارتىپپەن بۇزىلعان.
الايدا ماسەلەنىڭ تاعى ءبىر داۋلى تۇسى بار:
156 ملن تەڭگە كولەمىندەگى جوسپارلانعان قارجىنىڭ 95 ملن تەڭگەسى جەتكىزۋشىگە تولەنىپ ۇلگەرگەن.
بۇل قاراجات تاپسىرىس بەرۋشى مەن مەردىگەر تاراپتاردىڭ ورىندالعان جۇمىستار اكتىلەرىنە قول قويۋى ارقىلى اۋدارىلعان.
پروكۋراتۋرانىڭ مالىمەتىنشە، ورىندالعان جۇمىستار اكتىسىنە قول قويعان قىزمەتكەر تارتىپتىك جاۋاپكەرشىلىككە تارتىلادى.
ايتا كەتەيىك، اكتىگە قول قويعان تۇلعا – اۋدان اكىمىنىڭ مىندەتىن اتقارۋشى.
