Moldova úkimeti Táýelsiz Memleketter Dostastyǵyn (TMD) qurý týraly kelisimdi jáne uiymnyń jarǵysyn denonsatsiialaý jónindegi zań jobalaryn maquldady. Bul týraly úkimettiń baspasóz qyzmeti «Interfaksqa» habarlady, dep habarlaidy Dalanews.kz.
Úkimet osy sheshim arqyly Moldova TMD-nyń jarǵylyq organdarynan tolyq shyǵý rásimin bastady dep túsindirdi. Resmi Kishinev bul qadamdy uiymnyń qundylyqtary men negizgi qaǵidattary saqtalmai otyrǵanymen túsindiredi. Ásirese, Moldova biliginiń pikirinshe, bul talaptardy TMD-ny qurýǵa bastamashy bolǵan Resei Federatsiiasy oryndamai otyr.
Moldova Syrtqy ister ministrligi qaýly jobasyna jazylǵan túsindirme hatta TMD qurý týraly kelisimniń 5-babyna sáikes memleketter bir-biriniń aýmaqtyq tutastyǵyn jáne qoldanystaǵy shekaralardyń myzǵymastyǵyn moiyndap, qurmetteýge mindetti ekeni aitylǵanyn eske saldy.
Alaida vedomstvonyń málimetinshe, TMD-nyń negizinde jatqan bul qaǵida Resei tarapynan saqtalmai otyr.
Moldova SIM-i TMD kelisimin denonsatsiialaý eldiń Eýropalyq odaqqa qosylý úderisi aiasyndaǵy «tabiǵi ári sózsiz qadam» ekenin atap ótti.
Sonymen qatar Moldova biligi bul sheshim azamattardyń TMD elderindegi erkin júrip-turýyna áser etpeidi dep úmittenedi. Sebebi bul másele kóbine ekijaqty kelisimder arqyly retteledi.
Úkimet maquldaǵan zań jobalary endi parlamenttiń qaraýyna jiberiledi.
