Álemdik munai baǵasy 2022 jyldan beri alǵash ret barreline 100 dollardan asty, dep habarlaidy Dalanews.kz
9 naýryzdaǵy saýda-sattyq barysynda Brent markaly munaidyń baǵasy barreline 108,17 dollarǵa deiin kóterilip, 17%-ǵa qymbattady. Al WTI markaly munaidyń quny 19%-ǵa ósip, barreline 107,82 dollarǵa jetti.
Munai baǵasynyń kúrt ósýine Taiaý Shyǵystaǵy jaǵdaidyń shielenisýi áser etip otyr. Demalys kúnderi AQSh pen Izrail Tegeranǵa, sonyń ishinde munai saqtaý qoimalaryna jańa soqqylar jasaǵan.
Sonymen qatar Iran is júzinde Ormýz buǵazyn jaýyp tastaǵan. Bul – álemdegi eń mańyzdy munai tasymaldaý baǵyttarynyń biri. Sarapshylardyń aitýynsha, dúniejúzilik munaidyń shamamen 20%-y osy buǵaz arqyly ótedi. Qazirgi kezde onda milliondaǵan barrel munai men suiytylǵan tabiǵi gaz jetkizilmei, bógelip tur.
Osy jaǵdaiǵa bailanysty Birikken Arab Ámirlikteri men Kýveit munai óndirý kólemin qysqartatynyn málimdedi. Óitkeni munai men gazdy tutynýshylarǵa jetkizý qiyndap, úlken kólemdi saqtaityn oryn jetispei otyr.
Sarapshylardyń boljamynsha, eger Ormýz buǵazy naýryz aiynyń sońyna deiin jabyq kúiinde qalsa, munai baǵasy barreline 150 dollardan asyp, jańa rekord ornatýy múmkin.
