Almatydaǵy «Radıo úıi» ǵımaratynda «Shalqar» radıosynyń tolyq jóndeýden ótken jańa stýdıasy saltanatty túrde ashyldy. Jańa stýdıaǵa qazaqtyń tuńǵysh radıodıktory, Qazaq radıosynyń ardageri, KSRO-nyń qurmetti radısi, Qazaq KSR-niń eńbek sińirgen mádenıet qaıratkeri Mına Seıitovanyń esimi berildi, dep habarlaıdy Dala News.
Saltanatty sharaǵa radıo salasynyń ardagerleri, qazirgi qyzmetkerleri jáne buqaralyq aqparat quraldarynyń ókilderi qatysty. Stýdıanyń tusaýkeser rásiminde Rýslana Qudaıbergenova, Saýyq Jaqanova, Altyn Imanbaeva syndy radıonyń birqatar aǵa býyn ókilderi sóz sóılep, bul bastamanyń mańyzdylyǵyn atap ótti.
Jańa stýdıa «Shalqar» radıosynyń 60 jyldyq mereıtoıy aıasynda, talaı dıktorǵa tálim bergen ustaz, radıo óneriniń kórnekti ókili Mına Seıitovanyń jarqyn esimin ulyqtaý maqsatynda ashyldy.
Búginnen bastap jańa stýdıadan «Shalqar» radıosynyń tikeleı efırdegi onnan astam baǵdarlamasy tyńdarmanǵa jol tartady. Zamanaýı úlgide jabdyqtalǵan stýdıa qabyrǵasyna Mına Seıitovanyń portreti ornalastyrylyp, ıntererde Astana men Almaty qalalarynyń kórikti jerleri beınelengen.
Mına Seıitova 1919 jyly 20 tamyzda Qostanaı oblysy Qarabalyq aýdanynyń №9 aýylynda dúnıege kelgen. Ol 1934 jyly nebári 15 jasynda Qazaq radıosyna qyzmetke qabyldandy.
Ekinshi dúnıejúzilik soǵys jyldary Máskeýden taraǵan resmı aqparattardy KSRO halyqtaryna Iýrıı Levıtan jetkizse, qazaq dalasyna soǵys habarlaryn Mına Seıitovanyń úni jetkizdi.
Ol mıkrofon aldynda 44 jyl qyzmet etip, radıo salasynda birneshe býyn dıktor men mádenıet qaıratkerlerin tárbıeledi. Onyń shákirtteriniń qatarynda Qazaq KSR-iniń halyq ártisi Ánýarbek Baıjanbaev, KSRO halyq ártisi Ermek Serkebaev, Qazaq KSR-iniń halyq ártisi Zámzagúl Sháripova, aqyn Muqaǵalı Maqataev, KSRO halyq ártisi Bıbigúl Tólegenova, dıktorlar Mambet Serjanov, Gennadıı Marúhın, Qazaqstannyń eńbek sińirgen qaıratkeri Saýyq Jaqanova jáne basqa da tanymal tulǵalar bar.
Qazaqtyń tuńǵysh dıktory Mına Seıitova eńbek jolynda birneshe joǵary memlekettik nagradalarmen marapattalǵan. 1978 jyly qurmetti demalysqa shyǵyp, 1987 jyly dúnıeden ótti.
