Májilis Qazaqstan, Ózbekstan jáne Ázerbaijan arasyndaǵy jasyl energiiany óndirý jáne tasymaldaý salasyndaǵy strategiialyq áriptestik týraly kelisimdi ratifikatsiialady, dep habarlaidy Dala News.
Qujatqa taraptar 2024 jylǵy 13 qarashada Bakýde qol qoiǵan. Kelisim jańartylatyn energiia kózderi (JEK) salasynda uzaq merzimdi yntymaqtastyq ornatyp, úshjaqty energetikalyq seriktestiktiń turaqty modelin qalyptastyrýǵa baǵyttalǵan.
Qujatta jańartylatyn energiia kózderiniń áleýetin tiimdi paidalaný, sondai-aq úsh el arasynda jáne Eýropa memleketterimen ekologiialyq taza elektr energiiasynyń saýdasyn damytý qarastyrylǵan.
Sonymen qatar jasyl elektr energiiasyn turaqty túrde eksporttaý úshin Ortalyq Aziia men Ázerbaijannyń energetikalyq júielerin ózara bailanystyrý josparlanyp otyr.
Úshjaqty yntymaqtastyq aiasynda energetikalyq infraqurylymdy jańǵyrtý, jańa júiearalyq bailanystar qurý jáne birlesken jobalardy iske asyrý kózdelgen.
Kelisim boiynsha jasyl energiiany tasymaldaý jobasy da iske asyrylady. Joba aiasynda Kaspii teńiziniń túbimen Qazaqstan men Ózbekstannan Ázerbaijanǵa deiin sýasty kabeli tartylyp, keiin ol Qara teńiz energetikalyq dálizi arqyly Eýropa elderine elektr energiiasyn jetkizý júiesine qosylady.
Yntymaqtastyq teń quqyqtylyq, ózara tiimdilik, egemendik pen ulttyq múddelerdi qurmetteý qaǵidattaryna negizdelip júzege asyrylady.
