ءماجىلىس قازاقستان، وزبەكستان جانە ازەربايجان اراسىنداعى جاسىل ەنەرگيانى ءوندىرۋ جانە تاسىمالداۋ سالاسىنداعى ستراتەگيالىق ارىپتەستىك تۋرالى كەلىسىمدى راتيفيكاسيالادى، دەپ حابارلايدى Dala News.
قۇجاتقا تاراپتار 2024 جىلعى 13 قاراشادا باكۋدە قول قويعان. كەلىسىم جاڭارتىلاتىن ەنەرگيا كوزدەرى (جەك) سالاسىندا ۇزاق مەرزىمدى ىنتىماقتاستىق ورناتىپ، ءۇشجاقتى ەنەرگەتيكالىق سەرىكتەستىكتىڭ تۇراقتى مودەلىن قالىپتاستىرۋعا باعىتتالعان.
قۇجاتتا جاڭارتىلاتىن ەنەرگيا كوزدەرىنىڭ الەۋەتىن ءتيىمدى پايدالانۋ، سونداي-اق ءۇش ەل اراسىندا جانە ەۋروپا مەملەكەتتەرىمەن ەكولوگيالىق تازا ەلەكتر ەنەرگياسىنىڭ ساۋداسىن دامىتۋ قاراستىرىلعان.
سونىمەن قاتار جاسىل ەلەكتر ەنەرگياسىن تۇراقتى تۇردە ەكسپورتتاۋ ءۇشىن ورتالىق ازيا مەن ازەربايجاننىڭ ەنەرگەتيكالىق جۇيەلەرىن ءوزارا بايلانىستىرۋ جوسپارلانىپ وتىر.
ءۇشجاقتى ىنتىماقتاستىق اياسىندا ەنەرگەتيكالىق ينفراقۇرىلىمدى جاڭعىرتۋ، جاڭا جۇيەارالىق بايلانىستار قۇرۋ جانە بىرلەسكەن جوبالاردى ىسكە اسىرۋ كوزدەلگەن.
كەلىسىم بويىنشا جاسىل ەنەرگيانى تاسىمالداۋ جوباسى دا ىسكە اسىرىلادى. جوبا اياسىندا كاسپيي تەڭىزىنىڭ تۇبىمەن قازاقستان مەن وزبەكستاننان ازەربايجانعا دەيىن سۋاستى كابەلى تارتىلىپ، كەيىن ول قارا تەڭىز ەنەرگەتيكالىق ءدالىزى ارقىلى ەۋروپا ەلدەرىنە ەلەكتر ەنەرگياسىن جەتكىزۋ جۇيەسىنە قوسىلادى.
ىنتىماقتاستىق تەڭ قۇقىقتىلىق، ءوزارا تيىمدىلىك، ەگەمەندىك پەن ۇلتتىق مۇددەلەردى قۇرمەتتەۋ قاعيداتتارىنا نەگىزدەلىپ جۇزەگە اسىرىلادى.
