Konstitýtsiia – kez kelgen memlekettiń saiasi-quqyqtyq tuǵyry, qoǵamdyq kelisimniń basty kepili. Sondyqtan jańa Ata zań jobasynyń usynylýy – jai ǵana zańnamalyq ózgeris emes, el damýynyń baǵytyn aiqyndaityn tarihi kezeń. Osylai degen Astana qalasy Zań konsýltattar palatasynyń zań konsýltanty Nursultan Baimenov elimizde júrip jatqan konstitýtsiialyq reformalarǵa qatysty óz oiyn tarqatty, dep habarlaidy Dalanews.kz.
Onyń aitýynsha, bul qujattyń mazmuny men rýhy qoǵamnyń bolashaqtaǵy bet-beinesin qalyptastyrady.
«Jańa joba eń aldymen quqyq ústemdigin qamtamasyz etýge baǵyttalýǵa tiis. Zań bárine birdei qyzmet etkende ǵana memleket ádiletti bola alady. Konstitýtsiialyq normalardyń naqty ári túsinikti jazylýy – olardyń tiimdi oryndalýynyń basty sharty. Ekiushty tujyrymdar quqyq qoldaný tájiribesinde qaishylyqtar týǵyzýy múmkin. Sondyqtan árbir bap aiqyn ári naqty bolýy qajet», - dedi ol.
Óz oiyn bilik tarmaqtarynyń tepe-teńdigi týraly jalǵaǵan zańger demokratiialyq memlekette zań shyǵarýshy, atqarýshy jáne sot biliginiń arasyndaǵy teńdik – turaqtylyqtyń negizi ekenin eske saldy.
«Eger jańa Konstitýtsiia jobasy bilik tarmaqtarynyń ózara baqylaýy men teńgerimin kúsheitse, bul saiasi júieniń sapasyn arttyrady. Parlamenttiń rólin nyǵaitý, sot táýelsizdigin naqty kepildendirý – quqyqtyq memlekettiń basty belgileri», - dedi Nursultan Baimenov.
Sondai-aq ol adam quqyqtary men bostandyqtarynyń keńinen ári naqty bekitilýi – zamanaýi qoǵamnyń talaby ekenin jetkizdi.
«Áleýmettik kepildikter qaǵaz júzinde emes, naqty iske asatyn tetiktermen qamtamasyz etilýi kerek. Ásirese eńbek, bilim, densaýlyq saqtaý salalaryndaǵy quqyqtar naqty oryndalý tetikterimen bekitilgeni jón», - dedi sarapshy.
Nursultan Baimenov memlekettik til men qoǵamdyq talqylaýdyń mańyzyna da toqtala kele, Konstitýtsiia – ulttyq biregeiliktiń ainasy ekenin atap ótti.
«Memlekettik tildiń mártebesi tek deklarativti sipatta qalmai, naqty qoǵamdyq qatynastarda tolyq qoldanylýyn qamtamasyz etýge tiis. Til – tek qatynas quraly emes, memleketshildiktiń tiregi. Al Konstitýtsiia halyqtyń kelisimimen qabyldanýy kerek. Ashyq pikirtalas, sarapshylar men azamattyq qoǵam ókilderiniń usynystary – qujattyń sapasyn arttyrady. Árbir azamat óz pikirin bildirýge quqyly ári jaýapty», dep oiyn túiindedi maman.
