Qasym-Jomart Toqaev The National Interest basylymyna jariialanǵan maqalasynda Qazaqstannyń jańa Konstitýtsiiasy eldiń ádiletti, qýatty jáne órkendegen memleketke ainalýyna negiz bolatynyn málimdedi, dep habarlaidy Dalanews.kz.
Prezidenttiń aitýynsha, jýyrda ótken respýblikalyq referendým el damýynyń jańa kezeńin bastap berdi. Bul saiasi naýqan azamattardyń memleket bolashaǵyna beijai qaramaitynyn jáne mańyzdy sheshimderge tikelei qatysýǵa daiyn ekenin kórsetti.
Memleket basshysy referendýmǵa qatysý deńgeii joǵary bolǵanyn atap ótip, halyqtyń basym bóligi Konstitýtsiialyq reformalardy qoldaǵanyn jetkizdi. Onyń pikirinshe, bul – qoǵamnyń ádiletti ári quqyqtyq memleket qurýǵa degen suranysynyń aiqyn dáleli.
Toqaev jańa Ata zańnyń ózeginde adam quqyqtary men bostandyqtaryn qorǵaý qaǵidaty turǵanyn aitty. Qujatta zań ústemdigin qamtamasyz etý, sot júiesiniń táýelsizdigin kúsheitý jáne azamattardyń quqyqtaryn qorǵaý tetikteri aiqyndalǵan.
Sonymen qatar prezident jańa Konstitýtsiia «Kúshti Prezident – yqpaldy Parlament – esep beretin Úkimet» formýlasyna negizdelgenin atap ótti. Bul model bilik tarmaqtary arasyndaǵy tepe-teńdikti qamtamasyz etip, memlekettik basqarý júiesin jetildirýge baǵyttalǵan.
Maqalada ekonomikalyq reformalarǵa da erekshe nazar aýdarylǵan. Prezidenttiń sózinshe, Konstitýtsiiada menshik quqyǵyn qorǵaý kúsheitilip, investitsiialyq ahýaldy jaqsartýǵa jáne innovatsiiany damytýǵa jaǵdai jasalǵan. Bul Qazaqstannyń halyqaralyq seriktester aldyndaǵy senimin arttyra túsedi.
Sondai-aq Memleket basshysy aldaǵy ýaqytta Konstitýtsiiaǵa engiziletin ózgerister tek jalpyhalyqtyq referendým arqyly qabyldanatynyn atap ótti. Bul eldegi demokratiialyq úderisterdi odan ári nyǵaitýǵa múmkindik beredi.
Toqaevtyń pikirinshe, jańa Konstitýtsiia Qazaqstannyń uzaqmerzimdi damýynyń berik irgetasyna ainalyp, eldiń jahandyq básekege qabilettiligin arttyrýǵa yqpal etedi.
