Áleýmettik jelide astanalyq turǵyn 12 shilde kúni «Astana» – «Aqtóbe» fýtbol matchynan keiin ózin jáne aǵasyn politsiia qyzmetkerleri soqqyǵa jyqqanyn málimdedi, dep habarlaidy dalanews.kz.
Onyń aitýynsha, oqiǵa «Astana Arena» stadionynyń mańynda bolǵan.
«Matchtan keiin "Astana Arena" mańynda politsiianyń arnaiy jasaǵy (SOBR) esh sebepsiz meni jáne aǵamdy qaryndastarymyzdyń kózinshe aiaýsyz uryp-soqty. Ózderin tanystyrmastan bizdi ustap alyp, qyzmettik "Gazel" kóligine kúshtep otyrǵyzdy. Toǵyz adam jabylyp, bastan qolmen de, arnaiy aiaq kiimmen de soqqy jasady. Keiin jarty saǵattai kóliktiń ishinde ustap, olardyń júzderi kóringen videolardy kúshtep óshirtti», – dep jazdy turǵyn.
Ol oqiǵadan keiin birden aýrýhanaǵa júgingenderin, dárigerler denelerindegi kóptegen jaraqatty tirkep, jabyq bas-mi jaraqaty men mi shaiqalýy diagnozyn qoiǵanyn aitty. Sondai-aq, onyń sózinshe, aqyly negizde sot-meditsinalyq saraptama jasatqan. Alaida Astana qalasy politsiia departamentiniń ishki qaýipsizdik qyzmeti qylmystyq is qozǵaýdan bas tartyp, tek qyzmettik tekserý júrgiziletinin habarlaǵan. Jazba avtory 12 shilde kúni keshke «Astana Arena» mańynda bolǵan, oqiǵany videoǵa nemese fotoǵa túsirgen azamattardan ózimen bailanysqa shyǵýdy surady.
Al Astana qalasynyń Politsiia departamenti bul oqiǵaǵa qatysty túsinikteme berdi. Vedomstvo málimetinshe, Premer-ligadaǵy «Astana» – «Aqtóbe» matchy kezinde bir top jankúier ózin agressivti ustaǵan.
«Olar bylapyt sózder aityp, qarsylas komandanyń jankúierlerin arandatqan jáne ádepsiz qimyldar kórsetken. Oqiǵaǵa qatysýshylardyń biri qarsylas komandanyń týyn aiaǵyna bailap alǵan», – delingen politsiianyń habarlamasynda.
Politsiia qoǵamdyq tártipti saqtaý jáne janjaldyń aldyn alý maqsatynda oqiǵaǵa der kezinde aralasqanyn málimdedi. Qatysýshylar qyzmettik avtobýsqa jetkizilip, keiin bosatylǵan.
Sonymen qatar, atalǵan derek boiynsha qyzmettik tekserý taǵaiyndalǵan.
«Qyzmettik tekserý qorytyndysy boiynsha oqiǵaǵa qatysty barlyq tulǵanyń áreketine qoldanystaǵy zańnamaǵa sáikes quqyqtyq baǵa beriledi», – dep habarlady Astana qalasynyń Politsiia departamenti.
