Qazaqstan prezidenti Qasym-Jomart Toqaev Qorǵanys ministriniń orynbasarlaryn qabyldap, Qarýly kúshterdiń jaýyngerlik ázirligi men áskeri qajettilikterdi qarjylandyrý máselelerin talqylady, dep habarlaidy dalanews.kz.
Memleket basshysy – Qarýly kúshterdiń Joǵarǵy Bas qolbasshysy Qorǵanys ministriniń birinshi orynbasary, Qarýly kúshter Bas shtabynyń bastyǵy Aitqurman Omarbekov pen Qorǵanys ministriniń orynbasary Tatiana Savelevany qabyldady.
Kezdesý barysynda prezidentke Qarýly kúshterdiń qazirgi qyzmeti, jaýyngerlik ázirligi, áskeri daiarlyq is-sharalaryn qarjylandyrý jáne Qorǵanys ministrligi biýdjetiniń oryndalýy týraly esep berildi.
Sondai-aq áskeri qyzmetshilerdiń jai-kúii, áskerdiń jumyldyrý daiyndyǵy jáne áskeri bólimderge júktelgen mindetterdiń oryndalýy baiandaldy.
Memleket basshysyna armiiany damytý baǵdarlamasy, áskerdiń aǵymdaǵy qajettilikterin qarjylandyrý jáne bólingen qarajatty qaita bólý máseleleri jóninde aqparat usynyldy. Budan bólek, áskeri infraqurylymdy jaraqtandyrý jáne bólimshelerdiń kúndelikti qyzmetin qamtamasyz etý máseleleri qarastyryldy.
Kezdesýde áskerdi basqarý júiesin jetildirýge, sheshim qabyldaý jedeldigin arttyrýǵa jáne áskeri qyzmetshilerdi mamandaný baǵytyna sáikes daiarlaýǵa erekshe nazar aýdaryldy.
Sonymen qatar jumyldyrýdy josparlaý, áskeri rezervti daiarlaý, josparlanǵan shyǵyndardy negizdeý jáne biýdjet tártibin saqtaý máseleleri talqylandy. Prezidentke qarjylyq baqylaýdy kúsheitý jáne biýdjet qarajatyn paidalaný tiimdiligin baǵalaý tásilderi týraly da baiandaldy.
Kezdesý qorytyndysy boiynsha Qasym-Jomart Toqaev Qarýly kúshterdiń jaýyngerlik ázirligin joǵary deńgeide ustaý, armiianyń negizgi qajettilikterin qarjylandyrý jáne biýdjet qarajatyn utymdy paidalaný jóninde birqatar tapsyrma berdi.
