Brent markaly munai ótken aptany barreline shamamen 110,4 dollar baǵasymen aiaqtady. Bir apta ishinde munai baǵasy 2,3%-ǵa ósti. Juma kúni Iran Saýd Arabiiasynyń energetikalyq nysandaryna soqqy berýge daiyndalyp jatqany týraly aqparat taraǵannan keiin baǵa birden 3,8%-ǵa qymbattady. Alaida bul málimet ázirge resmi túrde rastalǵan joq, dep habarlaidy dalanews.kz.
Apta ishinde munai baǵasy barreline 112 dollarǵa deiin kóterilip, keiin 105,5 dollarǵa deiin tómendedi. Naryqqa Taiaý Shyǵystaǵy shielenis pen Oman shyǵanaǵy arqyly munai tasymaldaýdaǵy irkilister áser etti. UBS málimetinshe, osy baǵyt arqyly tasymaldanatyn shiki munai kólemi táýligine 9,1 mln barrelge deiin qysqarǵan.
Reseimen, Iranmen jáne Venesýelamen bailanysty tankerlerge salynǵan sanktsiialardy jeńildetý múmkindigi de talqylandy. Sonymen qatar AQSh-ta bir apta ishinde kommertsiialyq munai qory shamamen 8,5 mln barrelge azaiyp, 415,4 mln barrelge deiin tómendegeni habarlandy.
Goldman Sachs sarapshylary Brent munaiynyń ortasha baǵasyna qatysty boljamyn barreline 85 dollardan 90 dollarǵa deiin kóterdi. Sonymen birge bank kelesi jyly munai baǵasy orta eseppen 125 dollarǵa deiin ósýi múmkin degen stsenariidi de qarastyryp otyr. Mundai jaǵdai Parsy shyǵanaǵyndaǵy munai óndirý kólemi soǵysqa deiingi deńgeiden aitarlyqtai tómen bolyp qalǵan jaǵdaida týyndaýy múmkin.
Munaiǵa degen suranys boiynsha boljamdar ártúrli
Álemdik munaiǵa suranys jónindegi boljamdar halyqaralyq uiymdar arasynda ártúrli bolyp otyr. Munai eksporttaýshy elder uiymy (OPEK) biyl álemdik munaiǵa suranys táýligine 105,7 mln barreldi quraidy dep kútedi. Al kelesi jyly bul kórsetkish 108,3 mln barrelge deiin ósýi múmkin.
Halyqaralyq energetika agenttigi (HEA) álemdik munaiǵa suranysty táýligine 102,38 mln barrel deńgeiinde baǵalap otyr. Agenttik boljamy boiynsha, munai usynysy táýligine 100,65 mln barreldi quraidy.
