Astanada jasandy intellekt pen tsifrlyq tehnologiialar arqyly qylmystyń aldyn alýǵa baǵyttalǵan 60-qa jýyq joba tanystyryldy, dep habarlaidy dalanews.kz.
17 qazanda Alem.AI halyqaralyq ortalyǵynda Qazaqstan Respýblikasy Prezidentiniń jasandy intellektini damytý jónindegi jarlyǵyn iske asyrý aiasynda jáne Ishki ister ministriniń tapsyrmasy boiynsha «Kazakhstan Prevention Days – 2026» jobalar kórmesi ótti.
Is-sharaǵa Ishki ister ministrliginiń, politsiia departamentteriniń, ákimdikterdiń, joǵary oqý oryndary men úkimettik emes uiymdardyń ókilderi qatysty. Kórmede qylmystyń saldarymen kúresýmen qatar, onyń aldyn alýǵa jáne yqtimal qaýip-qaterdi erte anyqtaýǵa múmkindik beretin tehnologiialyq sheshimder usynyldy.
Jobalardyń bir bóligi telefon alaiaqtyǵymen kúresýge baǵyttalǵan. Atap aitqanda, abonentke jetpei alaiaqtyq qońyraýlardy buǵattaýǵa arnalǵan júie jáne azamattardy psihologiialyq manipýliatsiia tásilderin tanýǵa úiretetin «CIMM.PRO» interaktivti simýliatory tanystyryldy.
Kólik infraqurylymynyń qaýipsizdigin arttyrýǵa arnalǵan jobalar da kórsetildi. «JOLScan» platformasy jol jabynyndaǵy aqaýlardy anyqtap, jol-kólik oqiǵalarynyń aldyn alýǵa baǵyttalǵan. Al «SafeRail Qazaqstan» beineanalitika júiesi vokzaldarda qaraýsyz qalǵan zattar men izdeýde júrgen adamdardy naqty ýaqyt rejiminde anyqtaýǵa arnalǵan.
Balalar men otbasylardyń qaýipsizdigine qatysty birneshe bastama usynyldy. «AiMap» júiesi balalardyń qaýipti tsifrlyq toptarǵa tartylýyn erte anyqtaýǵa baǵyttalǵan. «E-Bagdar» ulttyq habarlandyrý alańy joǵalǵan adamdardy izdeýge kómektesýge arnalǵan. Al «Tsifrlyq immýnitet» jobasy jasóspirimderdiń kibersaýattylyǵyn arttyrýdy kózdeidi.
Kórmede turmystyq zorlyq-zombylyqtyń aldyn alýǵa baǵyttalǵan «Biz jaqynbyz 2.0», «Qaýipsiz otbasy – qaýipsiz qoǵam», «AL-JAN» jáne «SENIM TECHNOLOGIES» bastamalary da tanystyryldy.
Uiymdastyrýshylardyń aitýynsha, tsifrlyq quraldardy qoldaný yqtimal qaýipterdi erte anyqtap, quqyq buzýshylyqtardyń aldyn alý múmkindigin keńeitedi.
«Bizdiń maqsatymyz – qylmys bolǵannan keiin saldarymen kúresý emes, onyń túbegeili aldyn alý. Tsifrlyq quraldar qaýipti erte bastan kórýge múmkindik beredi. Sondyqtan tehnologiialyq ekojúieni qalyptastyrý – ýaqyt talaby», – dep atap ótti kórmeni uiymdastyrýshylar.
Is-sharaǵa Germaniia, Qyrǵyzstan, Ózbekstan jáne Tájikstannan kelgen sarapshylar da qatysty. Halyqaralyq qatysýshylar quqyq qorǵaý salasynda jasandy intellektini qoldaný jáne transshekaralyq kiberqylmyspen kúreste tehnologiialyq yntymaqtastyqty damytý máselelerin talqylady.
Uiymdastyrýshylardyń málimetinshe, kórmede usynylǵan jobalardy aldaǵy ýaqytta Astana men óńirlerde pilottyq rejimde iske qosý josparlanyp otyr. Olardyń tiimdiligi synaq nátijelerine bailanysty baǵalanbaq.
