Qazaqstan Respýblikasy Eńbek jáne halyqty áleýmettik qorǵaý ministrligi jumysynan aiyrylǵan azamattarǵa qandai kómek kórsetiletinin jáne ony qalai alýǵa bolatynyn túsindirdi. Azamattar jańa jumys tabýǵa, kásip úirenýge, biliktiligin arttyrýǵa jáne jumyspen qamtý baǵdarlamalaryna qatysýǵa múmkindik alady. Al mindetti áleýmettik saqtandyrý júiesine qatysqan jáne tiisti quqyǵy bar azamattarǵa jumysynan aiyrylýyna bailanysty áleýmettik tólem taǵaiyndalady, dep habarlaidy dalanews.kz.
Kómek alýdyń alǵashqy qadamy jumys izdeýshi retinde tirkelý. Ol úshin turǵylyqty jerdegi Mansap ortalyǵyna barýǵa, eGov.kz elektrondyq úkimet portaly nemese Enbek.kz Elektrondyq eńbek birjasy arqyly ótinish berýge bolady. Tirkelý kezinde azamat bilimi, kásibi daǵdylary, eńbek ótili jáne qandai jumysqa ornalasqysy keletini týraly málimetterdi kórsetedi.
Mansap ortalyǵynyń mamandary azamatqa laiyqty bos jumys oryndaryn tabýǵa kómektesip, qoljetimdi qoldaý sharalary týraly keńes beredi. Eger jumys tabylmasa, belgilengen talaptarǵa sai azamat jumyssyz retinde tirkelip, jumyspen qamtýǵa baǵyttalǵan belsendi sharalarǵa qatysý múmkindigi qarastyrylady.
Azamattyń kásibi bilimi men ómirlik jaǵdaiyna qarai oǵan jańa mamandyqty meńgerý, biliktiligin arttyrý, «Jastar praktikasyna» qatysý jáne sýbsidiialanatyn jumys oryndaryna ornalasý usynylýy múmkin. Sonymen qatar kásip bastaýǵa jáne jumysqa ornalasý maqsatynda erikti túrde qonys aýdarýǵa kómektesetin baǵdarlamalar bar. Olarǵa qatysý tiisti baǵdarlamalardyń talaptaryna sáikes júzege asyrylady.
Jumysynan aiyrylǵan azamattarǵa kórsetiletin qoldaýdyń taǵy bir túri – Memlekettik áleýmettik saqtandyrý qorynan tólenetin áleýmettik tólem. Ony alýǵa quqyǵy bar azamattarǵa jumys izdeý kezeńinde joǵaltqan tabysynyń bir bóligin óteý úshin beriledi.
2027 jyldyń 1 qańtarynan bastap bul tólemdi alý merziminiń eń uzaq kezeńi alty aidan úsh aiǵa deiin qysqarady. Tólemniń qansha ýaqyt beriletini azamattyń mindetti áleýmettik saqtandyrý júiesine qatysý ótiline bailanysty bolady. Sonymen qatar tólemniń eń joǵary mólsheri belgilenedi. Ol eń tómengi jalaqynyń jeti eselengen mólsheriniń 45%-ynan aspaidy. Ár azamatqa tólenetin naqty soma áleýmettik aýdarymdar júrgizilgen tabysy men saqtandyrý júiesine qatysý ótiline qarai esepteledi.
Jumyspen qamtýǵa baǵyttalǵan sharalardyń maqsaty azamattardyń qaitadan jumysqa ornalasýyna jáne óz tabysyn tabýyna kómektesý. Ár adamǵa usynylatyn qoldaý túri onyń jaǵdaiy men jumysqa ornalasý múmkindikterine qarai tańdalady. Keńes alý úshin turǵylyqty jerińizdegi Mansap ortalyǵyna júginińiz. Al bos jumys oryndary, jumysqa ornalasý múmkindikteri jáne jumyspen qamtý salasyndaǵy qyzmetter týraly tolyq aqparat Enbek.kz elektrondyq eńbek birjasynda qoljetimdi.
