Qazaqstanda qarjy naryǵynyń ósý qarqyny aitarlyqtai tómendedi. 2024-2025 jyldary 19-20 paiyz deńgeiinde bolǵan ósim 2026 jyldyń alǵashqy jartyjyldyǵynda nebári 2,9 paiyzdy quraǵan. R-Finance keńesshisi, ekonomist Arman Baiǵanov mundai ózgeriske nesie berý talaptarynyń qatańdatylýy áser etkenin aitady, dep habarlaidy dalanews.kz.
Ekonomistiń málimetinshe, biylǵy alǵashqy alty aida qarjy naryǵynyń ósimi el ekonomikasynyń damý qarqynynan da tómen bolǵan. Atap aitqanda, qarjy naryǵy 2,9 paiyz ósse, jalpy ekonomikalyq ósim 4,1 paiyzdy quraǵan. Ekonomikanyń 4,1 paiyz óskenin úkimettiń resmi derekteri de rastaidy.
Al buǵan deiin jaǵdai basqasha edi. 2024-2025 jyldary qarjy naryǵy jyl saiyn shamamen 19-20 paiyz ósip, ekonomikanyń jalpy ósý qarqynynan 3-4 ese joǵary kórsetkishke jetken.
Arman Baiǵanovtyń pikirinshe, 2026 jyly qarjy naryǵynyń ósimi baiaýlaýyna qarjy retteýshisiniń nesie berý tártibin qatańdatýǵa baǵyttalǵan birqatar sheshimi yqpal etken.
"2026 jyly qarjy naryǵynyń ósý qarqynynyń baiaýlaýyna ýákiletti organnyń nesie berý talaptaryn qatańdatý jóninde qabyldaǵan birqatar sharasy áser etti", – deidi ekonomist.
Degenmen sarapshy qarjy naryǵyn qatań retteýdiń oń jáne teris tustary bar ekenin atap ótti. Onyń túsindirýinshe, nesie berý talaptaryn shamadan tys kúsheitý eldegi iskerlik belsendilikti tómendetýi múmkin. Sebebi mundai jaǵdaida kásipkerler men azamattardyń qaryz qarajatyna qol jetkizý múmkindigi shekteledi.
"Qarjy naryǵyn retteýdiń el ekonomikasy úshin artyqshylyqtary da, kemshilikteri de bar. Nesie berý talaptaryn shamadan tys qatańdatý iskerlik belsendilikti tómendetedi. Al talaptardy jeńildetý esebinen qarjy naryǵynyń shamadan tys ósýi infliatsiianyń kúsheiýine jáne halyqtyń merzimi ótken nesielik beresheginiń artýyna alyp keledi. Sondyqtan belgili bir tepe-teńdikti saqtaý qajet", – dep esepteidi Arman Baiǵanov.
Ekonomist qarjy naryǵyn retteý kezinde eki mańyzdy mindetti qatar eskerý qajet ekenin alǵa tartty. Bir jaǵynan, nesie berý talaptary ekonomikalyq belsendilikke kedergi keltirmeýi tiis. Ekinshi jaǵynan, qaryz alýdy shamadan tys jeńildetý halyqtyń boryshtyq júktemesin arttyryp, qarjylai turaqtylyqqa qaýip tóndirýi múmkin.
