Eýraziialyq damý bankiniń (EAÓB) apta saiynǵy makroekonomikalyq sholýynda Qazaqstan, Qyrǵyzstan, Resei jáne Ózbekstan ekonomikasyndaǵy negizgi ózgerister jariialandy. Bank Qazaqstannyń jalpy ishki ónimi (JIÓ) 2026 jyldyń qorytyndysy boiynsha shamamen 5%-ǵa ósedi dep boljap otyr, dep habarlaidy dalanews.kz.
Qazaqstannyń syrtqy saýda ainalymy 103 mlrd dollarǵa jetti
2026 jyldyń alǵashqy segiz aiynda Qazaqstannyń syrtqy saýda ainalymy ótken jyldyń sáikes kezeńimen salystyrǵanda 12,8%-ǵa ósip, 103 mlrd dollarǵa jetti. EAÓB málimetinshe, eksport kólemi 19,5%-ǵa artyp, 60,4 mlrd dollardy quraǵan. Bul import ósiminen edáýir joǵary. Import kólemi osy kezeńde 4,5%-ǵa ulǵaiǵan.
Sonymen qatar 2026 jyldyń qańtar-qyrkúiek ailarynda negizgi kapitalǵa salynǵan investitsiia kólemi ótken jyldyń sáikes kezeńimen salystyrǵanda 7%-ǵa ósken. Eksporttyń artýy men investitsiialyq belsendiliktiń joǵary deńgeiin eskere otyryp, EAÓB Qazaqstan ekonomikasynyń 2026 jylǵy ósimin shamamen 5% dep baǵalaidy.
Qyrǵyzstan ekonomikasy 10,8%-ǵa ósti
Qyrǵyz Respýblikasynyń jalpy ishki ónimi 2026 jyldyń qańtar-qyrkúiek ailarynda ótken jyldyń sáikes kezeńimen salystyrǵanda 10,8%-ǵa artqan. EAÓB baǵalaýynsha, el ekonomikasynyń ósýine ishki suranys negizgi serpin berip otyr. Negizgi kapitalǵa salynǵan investitsiia kólemi 68,5%-ǵa ulǵaiǵan.
Bólshek saýda kólemi 15,4%-ǵa, al qonaqúiler men meiramhanalar kórsetken qyzmetter kólemi 8,6%-ǵa ósken. Bank negizgi kapitalǵa salynǵan investitsiia men tutynýshylyq belsendiliktiń artýy Qyrǵyzstan ekonomikasynyń jyl sońyna deiin shamamen 11%-ǵa ósýine yqpal etedi dep kútedi.
Reseide iskerlik belsendilik artty
Reseide de ekonomikalyq belsendiliktiń jaqsarǵany baiqalady. Resei Bankiniń iskerlik ahýal indeksi 3,6 tarmaqqa ósip, 1,2 tarmaqqa jetken. Bul – 2026 jylǵy mamyrdan bergi eń joǵary kórsetkish. EAÓB málimetinshe, indekstiń ósýine kásiporyndardyń qazirgi jaǵdaiǵa bergen baǵasynyń 4,2 tarmaqqa jaqsarýy jáne biznestiń qysqa merzimdi kútýleriniń 2,8 tarmaqqa artýy áser etken.
Kompaniialardyń investitsiialyq belsendiliktiń ósýine qatysty kútýleri de sońǵy úsh toqsandaǵy eń joǵary deńgeige jetken. Soǵan qaramastan, EAÓB Resei ekonomikasynyń 2026 jylǵy ósimin shamamen 0,7% deńgeiinde boljaidy.
Ózbekstanda infliatsiia jedeldedi
2026 jylǵy qyrkúiekte Ózbekstandaǵy jyldyq infliatsiia tamyzdaǵy 6,2%-dan 6,4%-ǵa deiin ósken. Baǵanyń ósýine benzin men propan qunynyń qymbattaýy áser etken. Bir jyl ishinde benzin baǵasy 20,1%-ǵa, al propan baǵasy 48,9%-ǵa ósken.
Qyzmet kórsetý salasyndaǵy baǵanyń ósýi de infliatsiianyń jedeldeýine qosymsha yqpal etken. Qyzmetter baǵasy tamyzdaǵy 6,4%-dan qyrkúiekte 7%-ǵa deiin kóterilgen. Osy faktorlardy eskere otyryp, EAÓB 2026 jyldyń sońynda Ózbekstandaǵy jyldyq infliatsiia shamamen 6,5% bolady dep boljap otyr.
