Keide sekýndtardyń ózi sheshýshi ról atqarady. Órt sóndirýshi jalyn sharpyǵan ǵimaratqa kirgende, kúmándanýǵa ýaqyt joq. Jaǵdaidy tez baǵalap, adamdy taýyp, órtten alyp shyǵý qajet. Osyndai jaǵdailarda Kókshetaý qalasynyń tótenshe jaǵdailar basqarmasyna qarasty №10 órt sóndirý bóliminiń bastyǵynyń orynbasary Qasymov Aian Sarynbaiuly 15 jyldan astam ýaqyt boiy qyzmet atqaryp keledi. Qyzmet jyldarynda ol talai kúrdeli jaǵdaiǵa tap bolǵan. Aian Qasymov alty adamdy jeke ózi órtten alyp shyqqan. Ol úshin árbir osyndai jaǵdai, eń aldymen, adam ómirin qutqarýmen qundy, dep habarlaidy dalanews.kz.
Aian Qasymov Aqmola oblysynyń Qarabaýyr aýylynda dúniege kelgen. Tórt jasynan bastap Shýchinsk qalasynda turyp, balalyq jáne jastyq shaǵy osy jerde ótti. Kásibi jolyn 2009 jyly Kókshetaý tehnikalyq institýtyna oqýǵa túsýden bastady. Oqý ornyn 2013 jyly támamdap, azamattyq qorǵaý júiesinde qyzmetin jalǵastyrdy. Qyzmet jolynda Shýchinsk qalasyndaǵy №6 mamandandyrylǵan órt sóndirý bóliminde aǵa injener, keiin Býrabai kentindegi №20 órt sóndirý bóliminiń jáne Shýchinsk qalasyndaǵy №5 órt sóndirý bóliminiń bastyǵynyń orynbasary qyzmetterin atqardy. Búginde Kókshetaý qalasyndaǵy №10 órt sóndirý bóliminde qyzmetin jalǵastyryp keledi.
Shýchinsk qalasynda Aian úsh adamdy qutqardy. Keiingi shaqyrtýlar kezinde taǵy úsh adamdy órtten alyp shyqty. Keibir jaǵdailarda sheshimdi sanaýly sekýnd ishinde qabyldaýǵa týra keldi. Qutqarý jumystarynyń barlyǵy kameraǵa túsirile bermeidi. Alaida órt sóndirýshi úshin eń basty nátije árdaiym bireý – adam órtten tiri shyǵýy kerek. Onyń aitýynsha, naǵyz órt sóndirýshi jaqsy dene daiyndyǵy men kásibi daǵdylarǵa ǵana emes, jaýapkershilikke, sabyrlylyqqa, otansúigishtikke jáne kómekke árdaiym daiyn bolýǵa tiis.
Aian Qasymov úshin qyzmet – adamdar aldyndaǵy kúndelikti jaýapkershilik. Azamattyq qorǵaý júiesindegi eńbek jyldary kásibi ósýge, kúrdeli synaqtardan ótýge jáne ár joly basty nátije adam ómirin qutqarý bolǵan jaǵdailarǵa toly boldy.
