Almatyda Allur avtomobil toby usynatyn Kia Qazaqstan men Qazaqstan tennis federatsiiasynyń seriktestigi aiasynda jańartylǵan Kia Tennis Park ashyldy. Bul joba sport infraqurylymyn damytýdy, jas sportshylardy qoldaýdy jáne tennisti halyqqa qoljetimdi etýdi kózdeidi, dep habarlaidy dalanews.kz.
Buryn TsSKA ataýymen belgili bolǵan tennis ortalyǵynyń tarihy 1970 jyldan bastalady. Búginde ortalyq jańa ataýǵa ie bolyp, kelbeti jańartyldy. Sonymen qatar Almatynyń sport ómirindegi mańyzdy ornyn saqtap qaldy. Jańǵyrtý jumystary balalardyń, kásibi sportshylardyń jáne tennis áýesqoilarynyń jattyǵýyna qolaily jaǵdai jasaýǵa baǵyttalǵan.
Resmi ashylý saltanatyna Kia Qazaqstan men Qazaqstan tennis federatsiiasynyń ókilderi, sportshylar, jattyqtyrýshylar, blogerler jáne arnaiy shaqyrylǵan qonaqtar qatysty. Is-shara baǵdarlamasy aiasynda lenta qiiý rásimi, ortalyqqa ekskýrsiia, kásibi tennisshilerdiń sheberlik sabaqtary jáne tanymal qonaqtardyń qatysýymen kórsetilim matchtary uiymdastyryldy. Jas kelýshiler úshin arnaiy jattyǵýlar men oiyn-saýyq sharalary ótkizildi.
Tennisti qoldaý Kia brendiniń halyqaralyq strategiiasynda mańyzdy oryn alady. 2002 jyldan beri kompaniia «Úlken dýlyǵa» sanatyna kiretin tórt iri týrnirdiń biri — Australian Open jarysynyń seriktesi bolyp keledi. Kia Tennis Park ortalyǵynyń ashylýy Qazaqstanda osy dástúrdiń jalǵasyna ainaldy. Qazaqstan tennis federatsiiasymen seriktestik sport infraqurylymyn damytýǵa, jas sportshylardy qoldaýǵa jáne elde tennisti keńinen nasihattaýǵa baǵyttalǵan.
Sońǵy jyldary Qazaqstannyń tennis infraqurylymy aitarlyqtai keńeidi. 2007 jyldan beri elimizde 391 korty bar 39 tennis ortalyǵy salyndy. Al sport infraqurylymyna tartylǵan jeke investitsiia kólemi 230 million dollardan asty.
Kia Tennis Park ortalyǵynyń ashylýy Kia Qazaqstan men Qazaqstan tennis federatsiiasy arasyndaǵy yntymaqtastyqtyń jańa kezeńine ainaldy. Bul seriktestik sporttyq ortany damytýǵa, jas talanttardy qoldaýǵa jáne Qazaqstanda tennistiń tanymaldyǵyn arttyrýǵa baǵyttalǵan.
