Qazaqstanda negizgi kapitalǵa salynǵan investitsiia kólemi artqanymen, ony qarjylandyrýdaǵy memlekettiń úlesi aitarlyqtai azaiǵan. Esesine kásiporyndardyń óz qarajaty men qaryz esebinen salynatyn investitsiialar kóbeiip keledi, dep habarlaidy dalanews.kz.
Qazaqstan qarjygerler qaýymdastyǵynyń (QQQ) málimetinshe, 2026 jyldyń qańtar-qyrkúiek ailarynda negizgi kapitalǵa baǵyttalǵan investitsiia kólemi 16,1 trln teńgege jetken. Bul ótken jyldyń sáikes kezeńimen salystyrǵanda 7 paiyzǵa joǵary.
Alaida investitsiianyń qarjylandyrý qurylymynda eleýli ózgeris baiqalady. Atap aitqanda, biýdjet qarajatynyń úlesi bir jyl ishinde 23 paiyzdan 14,3 paiyzǵa deiin tómendegen. Al memleket esebinen bólingen investitsiianyń naqty kólemi 32 paiyzǵa qysqarǵan.
Osy ýaqytta kásiporyndardyń óz qarajaty esebinen qarjylandyrylatyn investitsiia úlesi 63 paiyzdan 65,8 paiyzǵa ósti. Banktik nesielerdiń úlesi 3,7 paiyzdan 5,6 paiyzǵa, al ózge qaryz qarajatynyń úlesi 10,3 paiyzdan 14,3 paiyzǵa jetken.
Nátijesinde biznestiń menshikti jáne tartylǵan qarajatynyń jalpy investitsiiadaǵy úlesi 77 paiyzdan 85,7 paiyzǵa deiin ulǵaidy.
Qarjygerler qaýymdastyǵynyń sarapshylary bul ózgerister investitsiialyq belsendiliktiń memlekettik qarjylandyrýdan góri kásiporyndardyń óz múmkindikteri men syrttan tartylǵan qarajatqa kóbirek súiene bastaǵanyn kórsetetinin atap ótti.
Osylaisha, el ekonomikasyna salynatyn investitsiia kólemi ósip jatqanymen, ony qarjylandyrýdaǵy memlekettiń tikelei qatysýy azaiyp keledi.
