Qazaqstan Premer-ligasynyń 23-týry aiasynda ótken «Aqtóbe» men «Ordabasy» arasyndaǵy kezdesý tóreshilerdiń sheshimine qatysty daý týǵyzdy. 17 qazanda ótken matchta shymkenttik klýb 3:1 esebimen jeńiske jetti. Alaida «Aqtóbeniń» esepti teńestirýi múmkin golynyń esepke alynbaýy fýtbol jankúierleri men mamandar arasynda qyzý talqylanyp jatyr, dep habarlaidy dalanews.kz.
«Aqtóbeniń» goly nege esepke alynbady?
Kezdesýdiń alǵashqy taimynda Daniel Sosa 21-minýtta gol soǵyp, alań ielerin alǵa shyǵardy. Ekinshi taimda «Ordabasy» oiyn tizginin qolǵa alyp, Leo Natel 47-minýtta esepti teńestirdi. 53-minýtta Sergei Malyi shymkenttik klýbty alǵa shyǵarsa, 77-minýtta Tidian Keita úshinshi goldy soqty.
Oiynnyń 73-minýtynda Daniel Sosa taǵy bir gol soqqanymen, bas tóreshi Anton Kýchma qolmen oinaý erejesi buzyldy dep eseptep, goldy esepke almady. Eger bul gol sanalsa, esep 2:2 bolyp teńeser edi. Budan keiin «Ordabasy» taǵy bir gol soǵyp, matchty jeńispen aiaqtady.
Mamandar tóreshiniń sheshimine qatysty eki túrli pikir bildirdi
Qazaqstandyq burynǵy tóreshi ári fýtbol inspektory Serik Qoshqarov daýly epizodqa kúmán keltirip, Sosanyń golyn esepke almaý jónindegi sheshimdi qaita qaraý qajet bolǵanyn aitty. Onyń pikirinshe, match barysynda tóreshiniń basqa da daýly sheshimderi bolǵan.
Al burynǵy FIFA tóreshisi Sergei Lapochkin goldyń esepke alynbaýyn erejege sai sheshim dep baǵalaǵan. Onyń aitýynsha, Sosa dopty baspen soqqannan keiin dop óz qolyna tigen bolýy múmkin. Ereje boiynsha mundai jaǵdaida gol eseptelmeýi kerek.
Osylaisha, daýly epizodqa qatysty mamandardyń pikiri bir jerden shyqpai otyr.
Matchtyń sotqa jetetini ázirge belgisiz
Matchtan keiin tóreshilikke qatysty syn kúsheigenimen, «Aqtóbe» klýbynyń osy oiynǵa bailanysty sotqa talap aryz bergeni nemese sot protsesi bastalǵany týraly resmi aqparatty tabý múmkin bolmady. Sondyqtan kezdesýdiń sońy sotpen aiaqtalýy múmkin degen aqparat ázirge rastalmaǵan.
Match nátijesi resmi statistikada «Aqtóbe» – «Ordabasy» 1:3 esebimen tirkelgen.
