Qazaqstanda sheteldik filmderdi qazaqsha dýbliajben kórsetý talabyn zańmen bekitý usynyldy. Osyǵan qatysty petitsiia Mádeniet jáne aqparat ministrligine joldanǵan, dep habarlaidy dalanews.kz.
Petitsiia avtory – jýrnalist Jalǵas Ertai. Ol «Kinematografiia týraly» zańǵa ózgeris engizip, sheteldik filmderdi qazaq tilinde dybystaýdy mindetteýdi usynyp otyr. P-2026-00001027 nómirli petitsiia ePetition.kz platformasynda jariialanǵan. Qazir qujat moderatsiiadan ótip jatyr. Bul rásim qol jinaý bastalǵan kúnnen bastap 20 jumys kúnine sozylady.
Qazir zańda ne jazylǵan?
«Kinematografiia týraly» zańnyń 9-babyna sáikes, qazaq tilinde kórsetilmeitin filmderdiń qazaqsha aýdarmasy bolýy kerek. Aýdarma dýbliaj, sýbtitr nemese kadr syrtyndaǵy aýdarma túrinde usynylýy múmkin. Iaǵni qoldanystaǵy talap boiynsha filmdi qazaqsha tolyq dybystamai-aq, tek sýbtitrmen nemese kadr syrtyndaǵy aýdarmamen kórsetýge bolady.
Petitsiia avtory osy talapty ózgertip, sheteldik filmderdi prokatqa qazaqsha dýbliajben shyǵarýdy mindetteýdi usynady.
Qazaqsha dýbliaj qansha tabys ákeledi?
Petitsiia avtorynyń aitýynsha, qazaq tilindegi filmderge kórermen suranysy joǵary. Ol buǵan birneshe mýltfilmniń kassalyq túsimin mysal retinde keltirgen. Atap aitqanda, Disney kompaniiasynyń «Moana 2» mýltfilminiń qazaqsha nusqasy 12 kúnde 151 million teńgeden astam tabys jinaǵan. Bul Qazaqstandaǵy jalpy kassalyq túsimniń 12 paiyzyna teń bolǵan.
Al «Oijumbaq 2» mýltfilminiń qazaqsha nusqasy alǵashqy tórt kúnde 40 million teńgeden astam tabys tapqan. Petitsiia avtory bul kórsetkishter qazaqsha dýbliajdyń kommertsiialyq áleýeti joǵary ekenin kórsetedi dep esepteidi.
Petitsiiada qandai ózgerister usynylǵan?
Jalǵas Ertai birneshe talapty zańǵa engizýdi usynyp otyr:
- Qazaqsha dýbliaj film prokatqa shyqqan kúnnen bastap qoljetimdi bolýy kerek.
- Sýbtitr men kadr syrtyndaǵy aýdarma qazaqsha dýbliajdyń ornyna júrmeýi tiis.
- Shekteýli prokatqa shyǵatyn filmderge qatysty jeke talaptar belgilenýi qajet.
- Kinoteatrlar men distribiýtorlarǵa jańa talaptarǵa daiyndalý úshin ýaqyt berilýi kerek.
Bul bastama basqa tilderdegi filmderdi kórsetýge tyiym salýdy kózdemeidi.
Balalarǵa arnalǵan filmderge de qatysty
Petitsiia avtory qazaqsha dýbliajdyń balalar men otbasylyq aýditoriia úshin mańyzy zor ekenin atap ótken. Onyń pikirinshe, kishkentai balalar film mazmunyn sýbtitr arqyly tolyq túsine almaidy. Sondyqtan balalarǵa arnalǵan týyndylardyń qazaqsha dybystalǵan nusqasy qoljetimdi bolýy kerek.
