Qazaqstan Aziianyń mádeni murasyn qorǵaý aliansyna baqylaýshy memleket retinde qosyldy. Mundai sheshim Qytaidyń Hanchjoý qalasynda ótken uiym Keńesiniń IV otyrysynda qabyldandy. Bul elimizge tarihi eskertkishterdi saqtaý, arheologiialyq zertteýler júrgizý jáne zamanaýi tehnologiialardy paidalaný baǵytynda halyqaralyq yntymaqtastyqty keńeitýge múmkindik beredi, dep habarlaidy dalanews.kz.
Mádeniet jáne aqparat ministrliginiń málimetinshe, Qazaqstan delegatsiiasyn vitse-ministr Aibek Sydyqov basqarǵan. Jiynǵa 20-dan astam memlekettiń ókilderi men mádeni murany qorǵaý salasyndaǵy halyqaralyq uiymdardyń mamandary qatysty.
Otyrysta Qazaqstan tarihi-mádeni murany saqtaý baǵytyndaǵy yntymaqtastyqty damytýdyń úsh negizgi baǵytyn usyndy.
Birinshisi – tarihi jádigerlerdi saqtaý jáne qalpyna keltirý salasynda mamandar daiarlaý, sheteldik sarapshylarmen tájiribe almasý.
Ekinshisi – jasandy intellekt pen tsifrlyq tehnologiialardyń kómegimen tarihi eskertkishterdiń jai-kúiin qashyqtan baqylaý. Mundai tehnologiialar eskertkishterdiń ózgeristerin der kezinde anyqtap, olardyń búliný qaýpin baǵalaýǵa múmkindik beredi.
Úshinshisi – Uly Jibek joly boiyndaǵy tarihi nysandardy birlesip zertteý. Bul baǵytta halyqaralyq arheologiialyq ekspeditsiialar uiymdastyrý jáne ǵylymi zertteý nátijelerimen almasý kózdelip otyr.
Alaida atalǵan bastamalar ázirge usynys deńgeiinde. Naqty jobalardyń qashan iske asyrylatyny jáne olardy qarjylandyrý kólemi jariialanǵan joq.
Sapar aiasynda Aibek Sydyqov Alianstyń atqarýshy bas hatshysy Se Binmen kezdesti. Taraptar mádeni murany qorǵaý salasyndaǵy áriptestikti nyǵaitý máselelerin talqylap, Qazaqstannyń bolashaqta uiymǵa tolyqqandy múshe bolýy múmkin ekenin qarastyrdy.
Degenmen bul jóninde túpkilikti sheshim qabyldanǵan joq. Qazirgi ýaqytta Qazaqstan uiym jumysyna baqylaýshy memleket retinde qatysady.
Aita keteiik, Aziianyń mádeni murasyn qorǵaý aliansy 2023 jyly Qytaidyń bastamasymen qurylǵan. 2024 jyldan beri shtab-páteri Beijińde ornalasqan úkimetaralyq uiym retinde jumys isteidi. Onyń negizgi maqsaty – Aziia elderiniń tarihi jáne mádeni murasyn zertteý, saqtaý jáne qorǵaý salasyndaǵy yntymaqtastyǵyn damytý.
Qazaqstannyń Aliansqa qosylýy otandyq mamandarǵa halyqaralyq tájiribeni meńgerýge, birlesken ǵylymi jobalarǵa qatysýǵa jáne tarihi eskertkishterdi qorǵaýdyń jańa tásilderin engizýge jol ashady. Alaida bul múmkindikterdiń naqty nátijesi aldaǵy kelisimder men jobalardyń júzege asýyna bailanysty bolmaq.
