Shymkent qalalyq bilim basqarmasynda kadr máselesine qatysty jańa aqparat tarady. Áleýmettik jelidegi derekke sáikes, jańa oqý jyly bastalǵaly bir jarym ai ishinde basqarmanyń 20-ǵa jýyq qyzmetkeri óz erkimen jumystan ketken. Bul týraly qoǵam belsendisi Ońǵar Qabden Facebook paraqshasynda jazdy, dep habarlaidy dalanews.kz.
Onyń aitýynsha, qyzmetkerlerdiń jumystan ketýine qala ákiminiń uzaqqa sozylatyn jinalystary áser etýi múmkin.
"Oqý jyly bastalǵanyna bir jarym ai boldy. Al Shymkent qalalyq bilim basqarmasynan 20-ǵa jýyq qyzmetker jumystan óz erkimen ketip qalǵan. Ákim orynbasarynyń 15:00-de bastalyp, 21:00-ge deiin sozylatyn jinalysynan qajysa kerek. Sonda alty saǵattyq jinalysta ne máseleni talqylaidy eken? Oqý jyly aiaqtalǵansha bul basqarmada adam qalmasa tań qalmaimyz", – dep jazdy Ońǵar Qabden.
Jeli qoldanýshysynyń jazbasy kópshiliktiń nazaryn aýdaryp, qyzý talqylanyp jatyr. Pikir bildirýshilerdiń biri Zikirá Qojaev basqarý júiesindegi shamadan tys jinalystardyń jumys tiimdiligine keri áser etýi múmkin ekenin meńzegen.
"Qurmet kóp bolsa – kúrishtiń sory, dúrmek kóp bolsa – jumystyń sory", – dep jazdy ol.
Aita keteiik, Dalanews.kz redaktsiiasy atalǵan jaǵdaidyń mán-jaiyn anyqtaý maqsatynda Shymkent qalalyq bilim basqarmasyna resmi saýal joldady. Basqarmanyń jaýaby alynǵan soń qosymsha aqparat jariialanady.
