Mańǵystaý oblysynda Ulttyq qaýipsizdik komitetiniń departamenti Ishki ister ministrliginiń organdarymen birlesip, Jańaózen qalasynda qylmystyq toptyń áreketin toqtatty, dep habarlaidy dalanews.kz.
Lada.kz málimetinshe, top músheleri kásiporyn ujymyn jappai narazylyq aktsiialaryna shyǵýǵa arandatýǵa tyrysqan. Olardyń kózdegen maqsaty «Ózenmunaigaz» AQ-nan qosymsha qarjy alýǵa qol jetkizý bolǵan degen boljam bar.
Habarlamada top músheleri talaptary oryndalmaǵan jaǵdaida munaishylardyń narazylyq áleýetin paidalanyp, 2011 jylǵy Jańaózen oqiǵalaryn qaitalaýǵa árekettenýi múmkin bolǵany da aitylady. Aqparat kózi kúshtik qurylymdardyń jedel áreketiniń arqasynda jaǵdaidyń ýshyǵýyna jol berilmegenin málimdegen. Onyń ishinde jappai tártipsizdik, búlik shyǵarý jáne tonaý qaýpiniń aldyn alý múmkin bolǵany aitylǵan.
Ázirge taralǵan málimetterde ustalǵandar sany, top múshelerine taǵylǵan naqty aiyptar jáne qylmystyq istiń mán-jaiy týraly tolyq aqparat berilmegen.
