Маңғыстау облысында Ұлттық қауіпсіздік комитетінің департаменті Ішкі істер министрлігінің органдарымен бірлесіп, Жаңаөзен қаласында қылмыстық топтың әрекетін тоқтатты, деп хабарлайды dalanews.kz.
Lada.kz мәліметінше, топ мүшелері кәсіпорын ұжымын жаппай наразылық акцияларына шығуға арандатуға тырысқан. Олардың көздеген мақсаты «Өзенмұнайгаз» АҚ-нан қосымша қаржы алуға қол жеткізу болған деген болжам бар.
Хабарламада топ мүшелері талаптары орындалмаған жағдайда мұнайшылардың наразылық әлеуетін пайдаланып, 2011 жылғы Жаңаөзен оқиғаларын қайталауға әрекеттенуі мүмкін болғаны да айтылады. Ақпарат көзі күштік құрылымдардың жедел әрекетінің арқасында жағдайдың ушығуына жол берілмегенін мәлімдеген. Оның ішінде жаппай тәртіпсіздік, бүлік шығару және тонау қаупінің алдын алу мүмкін болғаны айтылған.
Әзірге таралған мәліметтерде ұсталғандар саны, топ мүшелеріне тағылған нақты айыптар және қылмыстық істің мән-жайы туралы толық ақпарат берілмеген.
