Depýtat Ashat Aimaǵambetov Úkimet saǵatynda eldegi jumyssyzdyq máselesin qozǵady, - dep habarlaidy Dalanews.kz.
Ashat Aimaǵambetov baiandamasyn taksi júrgizýshisimen bolǵan áńgimesinen bastady.
«Jýyrda takside kele jatyp, júrgizýshimen áńgimelestim. Onyń esimi Serjan eken. Munyń aldynda gidrolog-injener bolyp jumys istepti. Ol óziniń jumysy týraly, sý resýrsyn basqarý týraly maiyn tamyzyp áńgimeni bastap ketti. Bir ýaqyttta meniń suraq qoiatynymdy túsindi me, kishigirim ókinishpen, «túsinesiz ǵoi, meniń otbasym bar, moinymda nesielerim bar degendei, sondyqtan óz mamandyǵymdy – gidrologiia salasyn qanshalyqty jaqsy kórsem de, injener-gidrologtyń jalaqysymen alysqa bara almaisyń» dep aqtalýǵa tyrysty. Bul – bir adamnyń ǵana basynda bar jaǵdai emes, bizdegi eńbek naryǵyndaǵy túitkildi máselelerdiń kórinisi dep aitar edim. Meniń oiymsha, osynda otyrǵan ár depýtat áli talai osyndai mysaldardy aityp bere alady. Nege osyndai bilikti mamandar óz mamandyqtary boiynsha jumys istemei júr? Eńbek naryǵyndaǵy disbalanstyń sebebi nede? Nege mamandar jetkiliksiz» - dedi Aimaǵambetov.
Depýtattyń sózinshe, keibir mamandyqtarǵa grant bólinse de birde-bir adam ótinish bermegen.
«Taǵy bir aqparat: biz mamandar jetispeidi deimiz. Biraq granttardy igerý kezinde mynandai jait oryn alýda. Gidromineratsiia mamandyǵyna bólingen granttarǵa birde-bir adam ótinish bermegen. Iaǵni, konkýrs 0 adamdy qurady. Kólik qurylystary boiynsha bólingen 300 granttyń tek 29-na adam qabyldandy. Iaǵni, 1 grantqa 0,1 adamnan kelip otyr. Bul mysaldar kadr tapshylyǵy kúrdeli másele ekenin aiqyn kórsetedi. Iaǵni, problema grant sanynda ne onyń durys bólinbeýinde ǵana emes, tipti olardy daiyndaityn kolledjder men ýniversitetterdiń bolmaýynda nemese oqý sapasynda emes ekeni barlyǵymyzǵa anyq dep oilaimyn», – deidi depýtat.
Sondai-aq ol jumyspen qamtý sharalary jergilikti deńgeide qoǵamdyq jumysqa tartýdan, áleýmettik jumys oryndaryn usynýdan jáne jastar praktikasynan asa almai otyrǵanyn aitty.
«2008 jyldan bastap jumyspen qamtýdyń bes baǵdarlamasy qabyldandy. Iaǵni, ár eki jyl saiyn jańa baǵdarlama qabyldanyp otyrǵan. Olar qandai nátije berdi. Eger jumyspen qamtý sharalary negizgi quraldarmen ádistermen taldaityn bolsaq, onda olar osy jyldar boiy kontseptýaldy túrde aitarlyqtai ózgermegen. Negizinen ýaqytsha sipatta bolǵanyn baiqaimyz. Baiaǵy jartas – sol jartas. Biz áli kúnge deiin tizesi shyqqan sharalardy qoldanýdamyz. Jańa júieli sharalar az. Sol baiaǵy ýaqytsha jumys oryndaryn qurý. Oqytý, shaǵyn nesie berý jáne t.b. Al jergilikti deńgeide bul sharalar qoǵamdyq jumysqa tartýdan, áleýmettik jumys oryndaryn usynýdan jáne jastar praktikasynan asa almai otyr. Osy sharalardyń qanshalyqty tiimdi ekenin de zerttep jatqan eshkim joq» - deidi Aimaǵambetov.
Depýttattyń aitýynsha, Úkimettiń esebinen jyl saiyn shamamaen 900 myń adam jumysqa ornalasady.
«Endi myna sandy qarasaq. Úkimettiń esebinen jyl saiyn shamamaen 900 myń adam jumysqa ornalasady eken. sonda jyl saiyn 1 mln-ǵa jýyq adam jumysqa ornalassa, jumyssyzdyq deńgeii nege ózgerissiz qalyp otyr degen suraq barlyǵymyzdy mazalaidy. Eń qyzyǵy, sońǵy on jylda jumyssyzdyq 4,5 jáne 4,7 deńgeide ózgermei tur. 2023 jyl qorytyndysy boiynsha 963 myń adam jumysqa ornalastyrylǵan eken. Biraq jumyssyzdardyń sany nebári 445 myńnan aspaidy. Sonda jumysqa muqtaj adamdardyń sanynan eki ese kóp adam jumysqa ornalasqan ba? Sondyqtan suraq óte kóp», – deidi ol.
