Óskemende taǵy bir óndiris orny jumysyn bastady. «ÝK Trýbteh» JShS-ne qarasty kásiporynda polietilen qubyrlary shyǵarylatyn bolady, dep habarlaidy Dalanews. kz Altainews.kz saityna silteme jasap.
Jańa zaýyt Shyǵys Qazaqstannyń ǵana emes, kórshiles óńirlerdiń de suranysyn qanaǵattandyrýǵa qaýqarly. Ónimi de joǵary sapaly, óndiriste zamanaýi tehnologiialar ǵana qoldanylady.
Búgin óndiris ornynyń ashylý saltanatyna qatysqan oblys ákimi Ermek Kósherbaev kásiporynnyń tsehtaryn aralap kórip, munda atqarylyp jatqan jumysqa joǵary baǵasyn berdi.
– Qazirgi ýaqytta qurylysta paidalanyp jatqan materialdardyń basym kópshiligi sheteldik ónim ekeni jasyryn emes. Iaǵni, jyl saiyn elden syrtqa edáýir mólsherdegi qarajat ketip jatyr degen sóz. Bul degenimiz qyp-qyzyl shyǵyn. Sondyqtan mundai kásiporyndar biz úshin asa qajet. Sebebi, ondai óndiris oryndarynyń elimizdiń ekonomikasyna tigizer paidasy orasan zor.
Birinshiden, sheteldik materialdarǵa táýeldilikten arylamyz, ekinshiden, jańa jumys oryndary quralady. Óndiriste ozyq tehnologiialar ǵana qoldanylady eken. Bul – óte quptarlyq jait, – dedi oblys ákimi Ermek Kósherbaev.
Jańa kásiporynnan jylyna shamamen 3 600 tonna ónim shyǵarylady eken. Bolashaqta bul kórsetkishti bes myńǵa deiin jetkizý josparlanyp otyr. Bul týraly «ÝK Trýbteh» JShS-nyń Bas direktory Aidar Abdýldin málim etti.
– Oblysymyzdy qajetti ónimmen tolyqtai qamtýǵa shamamyz jetedi. Al bolashaqta respýblikamyzdyń ózge óńirleriniń naryǵyna shyǵýdy da kózdep otyrmyz. Ol úshin óndiris kólemin ulǵaitý qajet bolady. Mundai qadamǵa da daiynbyz. Jalpy, aldaǵy ýaqytta qosymsha tsehtar ashyp, jumysshylarymyzdyń sanyn arttyrýdy josparlaýdamyz, – deidi A.Abdýldin.
Osy rette qazirgi ýaqytta óndiris ornynda 45 adam jumyspen qamtylǵanyn aitý kerek.
Zaýyttyń tsehtaryn aralap kórgen aimaq basshysy atqarylyp jatqan jumysqa kóńili tolatynyn jetkizdi. Oblys ákiminiń sózinshe, qazirgi ýaqytta Shyǵys Qazaqstanda polietilen qubyrlarǵa degen suranys zor. Bul tek sý men jylý qubyrlaryna ǵana emes, basqa da maqsattarǵa qoldanylatyn materialdarǵa qatysty.
– Sizderdiń óndiris oryndaryńyz ornalasqan ýchaskede bos turǵan ǵimarattar kóp eken. Aldaǵy ýaqytta osy nysandardy da tseh retinde paidalanýǵa bolady. Óz tarapymyzdan sizderge jan-jaqty qoldaý kórsetýge ázirmiz, – dedi aimaq basshysy
