1994 jyly qazan aiynyń ortasynda Joǵary Keńes Nazarbaev usynǵan Ákejan Qajygeldindi premer-ministrlikke bekitti. Áitse de premerdiń orynbasarlyǵyna usynylǵan Altynbek Sársenbaiulyna qarsylyq bildirilip, Nazarbaevtyń betin qaitaryp tastady. Altynbek Sársenbaiuly Joǵary keńestiń minberine shyǵa bergende-aq, "bul joly prezident qatelesti" degen daýys jurtty selt etkizdi. Ol – depýtat Altynshash Jaǵanova edi.
Sol kezde Altynshash Jaǵanova:
"Men tek bir nárseni aitqym keledi. Nursultan Ábishuly sizdiń kandidatýrańyzdy qoldady jáne áli de qoldap keledi. Bul joly ol qatelesti", – dedi.
Al óz kezeginde Altynbek Sársenbaiuly:
"Bolashaqta baspasóz týraly zań kerek bolmaýy da múmkin, sóz bostandyǵyna kepil bolatyn Konstitýtsiianyń ózi de jetkilikti bolady", – dep jaýap berdi.
Bul tamasha ýáj edi...
Ótpeli kezeń de ótti. BAQ týraly zań – zań kúiinde qaldy. Osydan soń Ábish Kekilbaev daýysqa salyp, 58 depýtat jaqtap, 61 depýtat qarsy daýys berdi. Bul oqiǵanyń mánisin Altynshash Jaǵanovanyń ózinen de suradyq.
"Prezident qatty renjidi. "Alteke, munyńyz ne, ol jaqsy jigit" dedi. "Jaqsy emes, Nureke! Kóresiz áli" dedim. Mine, aitqanym keldi. Óitkeni biz depýtat bolardyń aldynda men bir jyl Almaty qalalyq keńestiń depýtaty boldym. Sosyn bir jyldan Joǵary Keńestiń depýtaty bolǵasyn, men ol jaqtaǵy jumysymnan bas tarttym. Sol ýaqytta qalada bul da (Altynbek Sársenbaiuly – red.) depýtat boldy. Jurtty mensinbei, aitqan adamdardy qatty toitaryp otyrdy. Tártibi sondai boldy. Printsipteri basqasha bolatyn. Maǵan unamaityn áiteýir", – dedi Altynshash Jaǵanova.
Osy jaitty Altynbek Sársenbaiuly eske alyp:
"Meni bekitpegenine áli kúnge rizamyn, raqmet! Meniń ornyma bolǵan vitse-premerdiń kezinde búkil áleýmettik salanyń tas-talqany shyqty. Mektepter qysqardy, aýrýhanalar jabyldy, kitaphanalar ǵaiyp boldy. Ol kezde men jastaý edim. Solaqai sheshimderdiń bárine tabandap qarsy turar edim dep aita almaimyn. Eger sol kezde vitse-premer bolsam, tas-talqan bolǵan dúnieniń obaly áli kúnge deiin moinymda turar edi. Meni sol joly Qudai qaqty. Áli kúnge sol apaiymyzdy kórsem, raqmet aitqym kep turady", – degen edi.
Asylhan MAMAShULYNYŃ
"Qily kezeń" derekti filminiń 12-bóliminen úzindi.
