Qazaqstan men Túrkiia arasyndaǵy investitsiialyq yntymaqtastyq ózara senim men strategiialyq seriktestiktiń joǵary deńgeiin tanyta otyryp, turaqty serpinmen damyp keledi, dep habarlaidy dalanews.kz.
Túrkiia elimzidiń ekonomikasyndaǵy negizgi sheteldik investorlardyń biri bolyp sanalady. Túrkiia shamamen 6 mlrd dollar kóleminde Qazaqstanǵa investitsiia quiyp, eldegi iri investorlar arasynda 15-orynǵa ie boldy. Óz kezeginde Qazaqstan da Túrkiia ekonomikasyna 2,2 mlrd dollar kóleminde investitsiia baǵyttady.
Qazirgi ýaqytta Qazaqstanda túrik kapitalynyń qatysýymen jalpy quny shamamen 9,5 mlrd dollar quraityn 171 jobadan turatyn aýqymdy jobalar pýly qalyptasty. Onyń ishinde 4 mlrd dollarǵa teń 98 joba sátti iske asyryldy, 3,9 mlrd dollardy quraityn 50 joba belsendi iske asyrylý satysynda, al 1,6 mlrd dollarǵa baǵalanǵan 23 áleýetti joba investitsiialyq ózara is-qimyldy odan ári keńeitýge berik negiz qalyptastyryp otyr.
Bul dinamika eki eldiń investitsiialyq áriptestigi sandyq turǵydan ǵana emes, sapalyq turǵydan da damyp kele jatqanyn, ónerkásiptik kooperatsiiany nyǵaityp, uzaq merzimdi ekonomikalyq ósimge myqty negiz qalaitynyn aiqyn kórsetedi.
Memleket basshysynyń 2025 jylǵy 29 shildede Túrkiiaǵa jasaǵan sapary ekonomikalyq bailanystardy damytýdaǵy mańyzdy qadam boldy. Onyń aiasynda agroónerkásiptik keshen men logistika salalarynda jalpy somasy 400 mln dollardan asatyn kelisimderge qol qoiyldy. Qol jetkizilgen ýaǵdalastyqtar investitsiialyq yntymaqtastyqty keńeitýge jáne birlesken jobalardy iske asyrýǵa qosymsha serpin berdi.
Ekonomikalyq áriptestiktiń joǵary deńgeiiniń mańyzdy dáleli retinde 2026 jylǵy 15 sáýirde Astanada QR Premer-Ministri O.Bektenov pen TR Vitse-prezidenti Dj. Iylmazdyń teń tóraǵalyǵymen ótken Saýda-ekonomikalyq yntymaqtastyq jónindegi úkimetaralyq komissiianyń 14-otyrysyn atap ótýge bolady. Oǵan qosa, eki eldiń 40 iri biznes qurylymy basshylarynyń qatysýymen dóńgelek ústel ótip, isker toptardyń belsendi atsalysýyn jáne praktikalyq yntymaqtastyqty tereńdetýdiń jańa múmkindikterin aiqyndady.
