Qazaqstannyń media qaýymdastyǵy Parlament depýtattaryna ashyq hat joldap, sailaý kezindegi qoǵamdyq pikirge qatysty zańnamany ózgertýdi surady, dep habarlaidy dalanews.kz.
Ashyq hatta jýrnalister men BAQ ókilderi «Qazaqstan Respýblikasyndaǵy sailaý týraly» Konstitýtsiialyq zańǵa jáne Ákimshilik quqyq buzýshylyq týraly kodekske engiziletin túzetýlerdi qoldaýǵa shaqyrǵan.
Media ókilderiniń aitýynsha, qazirgi zań redaktsiiasynda jýrnalistik material men kásibi sotsiologiialyq zertteýdiń arasy naqty ajyratylmaǵan.
«Qoldanystaǵy ÁQBtK-niń 120-babynda kásibi sotsiologiialyq zertteý men jýrnalistik material aiasyndaǵy azamattar pikirin jinaýdyń ara jigi naqty kórsetilmegen. Sonyń saldarynan blits saýalnama, kóshe suhbaty, interaktivti daýys berý, azamattardyń pikiri siiaqty jýrnalistik formattar sotsiologiialyq zertteý retinde qate túsindirilip jatyr», - delingen hatta.
Avtorlardyń sózinshe, mundai quqyqtyq túsiniksizdik jýrnalisterdiń ákimshilik jaýapkershilikke tartylýyna ákelip otyrǵan jaǵdailar bar.
«Ókinishke qarai, qoǵamdyq mańyzy bar máseleler boiynsha azamattardyń pikirin jariialaǵany úshin jýrnalister men redaktsiialardy jaýapkershilikke tartý jaǵdailary tirkeldi. Bul quqyqtyq anyqsyzdyqtyń bar ekenin kórsetedi jáne kásibi jýrnalistik qyzmetti shekteý qaýpin týǵyzady», - dep jazylǵan úndeýde.
Media qaýymdastyǵy jýrnalistik materialdardy zań júzinde bólek kórsetý qajet ekenin aitty.
Olar «qoǵamdyq pikirge saýalnama» uǵymyna naqty anyqtama engizýdi usynyp otyr.
Usynylǵan normada qoǵamdyq pikir saýalnamasy «azamattardyń elektoraldyq kózqarasyn arnaiy ádisteme men irikteý arqyly júieli túrde zertteý» retinde anyqtalýy kerek ekeni kórsetilgen.
Sondai aq media ókilderi Ákimshilik kodekstiń 120-babyna jýrnalistik qyzmet aiasyndaǵy materialdardy jaýapkershilikten bosatatyn arnaiy norma qosýdy surady.
«BAQ pen onlain platformalarda jýrnalistik qyzmet sheńberinde daiyndalǵan, reprezentativti sotsiologiialyq zertteý nemese sailaý nátijesin boljaý bolyp sanalmaityn materialdar ákimshilik jaýapkershilikke jatpaýy tiis», - dep usynys bildirdi avtorlar.
Ashyq hat ieleri bul ózgerister jýrnalisterdiń kásibi qyzmetin qorǵaýǵa múmkindik beredi dep esepteidi.
«Jýrnalister qoǵam úshin mańyzdy taqyryptardy erkin kóterip, azamattardyń pikirin ákimshilik qysymnan qoryqpai jariialai alýy kerek. Sondyqtan jýrnalistik material men sotsiologiialyq zertteýdiń arajigin zań júzinde naqty ajyratý qajet», - delingen úndeýde.
