Elordada esirtki zattaryn jarnamalaıtyn graffıtı sýretterdi boıaýǵa arnalǵan kezekti aksıa ótti,- dep habarlaıdy Dalanews.kz

İs-shara Saraıshyq kóshesinde uıymdastyryldy. Oǵan qalalyq polısıa departamentiniń esirtki qylmystaryna qarsy is-qımyl basqarmasynyń qyzmetkerleri, «Astana jastary» jastar resýrstyq ortalyǵynyń eriktileri, tanymal sportshylar men blogerler qatysty.

Olar esirtki saıttarynyń mekenjaılary kórsetilgen belgilerdi boıap, olardyń ornyna «Nashaqorlyqqa jol joq!» degen jazýy bar graffıtı saldy.

Sharany Esil aýdany ákiminiń apparaty, Astana qalasy PD esirtki qylmysyna qarsy is-qımyl basqarmasy jáne aýdandyq polısıa basqarmasy birlesip uıymdastyrdy.

Astana qalasy kıkboksıń federasıasynyń vıse-prezıdenti, №7 BJSM aǵa jattyqtyrýshysy, esirtki qylmysyna qarsy is-qımyl keńesiniń múshesi Ernar Omarov óz pikirin bildirdi.

«Men ómir boıy osy qalada turyp kelemin jáne onyń árbir turǵynynyń taǵdyryna alańdaımyn. Sondyqtan osyndamyn. Biz esirtki jarnamalaǵan sýretterdi boıap jatyrmyz. Jattyǵýlarda shákirtterime neniń jaqsy, neniń jaman ekenin túsindiremin. Esirtki – zulymdyq. Onymen sózben de, ispen de kúresý kerek», – dedi ol.

Osy pikirdi elordalyq avtomotosport federasıasynyń prezıdenti, esirtki qylmysyna qarsy is-qımyl keńesiniń múshesi Anatolıı Bondar da qoldaıdy.

«Bizdiń mindetimiz – narkograffıtıdi joıý úshin barynsha kúsh salý. Biz quqyq qorǵaý organdarymen on jyldan beri birlesip jumys istep kelemiz. Sebebi jastardyń taǵdyryna alańdaımyz jáne olardyń esirtkige emes, sportqa bet burǵanyn qalaımyz», – dedi ol.

NEET sanatyndaǵy jastarmen jumys isteý bóliminiń basshysy Sultan Ómirǵalıevtiń aıtýynsha, bul shara «Zań jáne tártip» baıandaý formaty aıasynda ótip jatyr.

«Biz óskeleń urpaqqa esirtkiniń zıanyn aldyn ala túsindirýimiz kerek. Onyń ornyna sport, kitap oqý, saıahat jasaý sıaqty mańyzdy ister baryn kórsetkenimiz jón», – dep qosty ol.