Asqar Ermyshev – munai óńdeý salasynyń úzdik mamany. Asqar Ryspaiuly 1994 jyldan bastap Atyraý munai óńdeý zaýytynda eńbek etip keledi. Búginde ol munai óńdeý jáne munai ónimderin tereń kúkirtsizdendirý óndirisiniń bastyǵy qyzmetin atqaryp, 30 jyldan astam ýaqyt ishinde kásibi bilikti, jaýapty ári jańashyl basshy retinde tanyldy.
Óziniń mol tájiribesi men tereń biliminiń arqasynda Asqar Ryspaiuly óndiristik úderisterdi tiimdi uiymdastyryp, tsehtyń kórsetkishterin turaqty ósimge jetkizdi. Onyń jetekshiligimen ónim kólemi men sapasy únemi jospardan asyra oryndalyp keledi. Ol óndiristiń barlyq kezeńderine keshendi baqylaý júrgizip, «tar jerlerdi» der kezinde anyqtap, shyǵyndardy azaityp, tehnologiialyq tártiptiń múltiksiz oryndalýyn qamtamasyz etedi.
Asqar Ryspaiuly salanyń damýyn únemi qadaǵalap, jańa tehnologiialardy óndiriske engizýdi belsendi qoldaidy. Onyń bastamasymen energiia únemdilikti arttyrýǵa jáne ekologiialyq kórsetkishterdi jaqsartýǵa baǵyttalǵan 20-dan astam ratsionalizatorlyq usynys sátti júzege asyryldy. Sonymen qatar, ol benzin men dizel otynyn gidrotazalaý qondyrǵysyn iske qosýda jáne aromatty kómirsýtekter keshenin igerýde erekshe ról atqardy.
Asqar Ryspaiulynyń júieli oilaý qabileti men basqarýshylyq tájiribesi tsehtyń turaqty ári úzdiksiz jumysyn qamtamasyz etip, zaýyttyń básekege qabilettiligin arttyryp otyr. Ol ujymda syily, áriptesteriniń pikirin baǵalaityn basshy retinde qurmetke ie.
Sonymen birge jas mamandarǵa tálimgerlik jasap, olardyń kásibi damýyna úles qosýda. Osylaisha, Ermyshev Asqar Ryspaiuly – tek óz ujymynyń ǵana emes, búkil munai-gaz salasynyń damýyna eleýli úles qosyp kele jatqan aitýly tulǵa. Onyń eńbegi Qazaqstan ekonomikasynyń órkendeýine qyzmet etýde.
